اسلام آباد: حکومت نے برّی، بحریہ اور فضائیہ کے سربراہان کی مدت میں ملازمت میں توسیع کردی ہے۔ تینوں سروسز چیفس کی مدت ملازمت تین سال سے بڑھا کر پانچ سال کردی ہے۔
قومی اسمبلی کے بعد سینیٹ سے بھی منظور ہونے والے پاکستان آرمی ایکٹ، پاکستان ایئر فورس ایکٹ اور پاکستان نیوی ایکٹ ترمیمی بلز کے مطابق آرمی چیف دو ہزار ستائیس، سربراہ پاک بحریہ دوہزار اٹھائیس اور سربراہ پاک فضائیہ دوہزار چھبیس تک اپنے عہدوں پر برقرار رہیں گے۔
آرمی چیف جنرل عاصم منیر باجوہ کو نومبر دوہزار بائیس میں چیف آف آرمی سٹاف مقرر کیا گیا تھا انہوں نے نومبر دوہزار پچیس میں ریٹائر ہونا تھا لیکن نئے قانون کے تحت اب وہ نومبر دوہزار ستائیس تک آرمی چیف ہوں گے۔
پاک بحریہ کے سربراہ ایڈمرل نوید اشرف کو تین اکتوبر دوہزار تیئس کو عہدے پر تعینات کیا گیا تھا۔ انہوں نے اکتوبر دوہزار چھبیس میں ریٹائر ہونا تھا لیکن اب وہ اکتوبر دوہزار اٹھائیس میں ریٹائر ہوں گے۔
پاک فضائیہ کے سربراہ ظہیر احمد بابر سدھو کو انیس مارچ دوہزار اکیس کو ایئرفورس کا سربراہ لگایا تھا۔ ان کی مدت ملازمت رواں سال مارچ میں ختم ہو رہی تھی لیکن انہیں سترہ مارچ دوہزار چوبیس کو ایک سال کی توسیع دی گئی جو مارچ دوہزار پچیس میں ختم ہوگی لیکن نئے قانون کے تحت وہ ایک سال مزید اپنے عہدے پر رہیں گے اور پانچ سال مکمل کرکے مارچ دو ہزار چھبیس میں ریٹائر ہوں گے۔
