میکرون کے ہنوئی دورے میں 14 اسٹریٹجک معاہدوں پر دستخط، Airbus نے VietJet کو 20 A330neo طیارے فروخت کیے
فرانسیسی صدر ایمانوئل میکرون کے سرکاری دورۂ ویتنام کے دوران فرانس اور ویتنام نے دفاع، ہوابازی، خلائی ٹیکنالوجی، صحت اور جوہری توانائی سمیت کئی اسٹریٹجک شعبوں میں 14 بڑے معاہدوں پر دستخط کیے۔ یہ کسی فرانسیسی صدر کا تقریباً دس سال بعد پہلا دورہ ہے، جو انڈو پیسفک میں فرانس کی سرگرم موجودگی کا مظہر ہے۔
اس دورے کا سب سے نمایاں معاہدہ ایئربس اور ویتنام کی بجٹ ایئر لائن VietJet کے درمیان 20 A330neo وائیڈ باڈی طیاروں کی خریداری کا ہے، جو 2024 کے معاہدے کا تسلسل ہے۔ یہ معاہدہ نہ صرف ویتنام کی سول ایوی ایشن مارکیٹ کی توسیع کا عکاس ہے بلکہ ایئربس کی اس مارکیٹ پر 86 فیصد شیئر برقرار رکھنے کی حکمت عملی کا حصہ بھی ہے۔
دفاعی، صنعتی اور سائنسی شعبوں میں تعاون
کل 14 معاہدوں میں شامل شعبے درج ذیل ہیں:
- دفاعی تعاون، خاص طور پر سائبر سیکیورٹی اور انسداد دہشت گردی
- سول جوہری توانائی کی مشترکہ ترقی
- زمین کے مشاہداتی سیٹلائٹ پروگرام میں ایئربس کی شراکت
- ریلوے نیٹ ورک کی جدید کاری
- دوا ساز کمپنی Sanofi سے ویکسین کی فراہمی
حکام کے مطابق، مزید معاہدوں کا اعلان منگل کے روز متوقع ہے، کیونکہ صدر میکرون کا دورہ جاری ہے۔
ایک مشترکہ پریس کانفرنس میں، صدر میکرون نے بحیرہ جنوبی چین میں چین کے ساتھ جاری کشیدگی کے تناظر میں نیوی گیشن کی آزادی پر فرانس کے مؤقف کو دہرایا، جسے ویتنام انتہائی اہمیت دیتا ہے۔ انہوں نے کہا”فرانس عالمی تجارتی راستوں کی حفاظت، اور بین الاقوامی قوانین کی پاسداری کے لیے پرعزم ہے۔”
ویتنامی صدر لوونگ کوانگ نے بھی ان جذبات کی تائید کرتے ہوئے کہا کہ دفاعی تعاون تزویراتی معلومات کے تبادلے اور صنعتی اشتراک کو فروغ دے گا
میکرون کا ویتنام دورہ جنوب مشرقی ایشیا کے وسیع تر سفارتی دورے کا حصہ ہے، جس میں وہ انڈونیشیا اور سنگاپور بھی جائیں گے۔ منگل کو وہ ہنوئی کی ایک یونیورسٹی کا دورہ کریں گے، جس کے بعد ان کی جکارتہ روانگی متوقع ہے۔
About The Author
