لاس اینجلس :امریکی پاپ سٹار اولیویا روڈریگو نے غزہ پر اسرائیل کے جاری حملے پر اپنی خاموشی توڑتے ہوئےکہا ہے کہ فلسطین میں بے گناہ لوگوں پر ہونے والی تباہی کو دیکھ کر جو دل ٹوٹ رہا ہے اسے بیان کرنے کے لیے الفاظ نہیں ہیں،غزہ میں مائیں، باپ اور بچے بھوک سے مر رہے ہیں، پانی کی کمی کا شکار ہیں اور بنیادی طبی دیکھ بھال اور انسانی امداد تک رسائی سے محروم ہیں۔
انسٹاگرام کے ذریعے شیئر کیے گئے اپنے ایک پیغام میں صورتحال کو خوفناک اور مکمل طور پر ناقابل قبول قرار دیا۔گلوکارہ نے کہا کہ اسرائیل، فلسطین یا دنیا میں کہیں بھی کوئی بچہ ایسا نہیں ہے جو اس مصیبت کا مستحق ہو جو ہم ان بچوں کو برداشت کرتے ہوئے دیکھ رہے ہیں، یہ خوفناک اور مکمل طور پر ناقابل قبول ہے،ان سے دستبردار ہونا ہماری مشترکہ انسانیت کو ترک کرنا ہے۔
گریمی ایوارڈ یافتہ اولیویا روڈریگو نے بتایا کہ انہوں نے اس خوفناک صورتحال کے متاثرین کی مدد کرنے کے لیے یونیسیف کو عطیہ دیا ہے،انہون نے اپنے پرستاروں کو بھی کہا کہ اگر آپ کے پاس وسائل ہیں تو عطیہ کرنے کی ترغیب دیں ۔قبل ازیں برطانیہ کے اداکاروں، موسیقاروں، کارکنوں اور دیگر عوامی شخصیات نے برطانوی وزیر اعظم کیئر سٹارمر سے مطالبہ کیا گیا کہ وہ غزہ میں ہونے والی ہولناکیوں میں برطانیہ کی مداخلت کو ختم کریں۔
اس سے قبل سینما کی دنیا کی 350 سے زائد شخصیات نے جن میں ہالی ووڈ اسٹارز رچرڈ گیئر اور سوزن سارینڈن شامل ہیں، نے کانز فیسٹیول کے موقع پر شائع ہونے والے ایک کھلے خط میں غزہ میں نسل کشی کی مذمت کی تھی۔
