غزہ پر اسرائیلی قبضے کے مجوزہ منصوبے اور فلسطینیوں کی نسل کشی کے خلاف ترکیہ کا بڑا اقدام۔۔
ترکیہ نے اسرائیل کے ساتھ تمام تجارتی و معاشی تعلقات منقطع کر دیئے۔۔ انقرہ میں غزہ کی صورتحال پر ہونے والی ایک تقریب سے خطاب کرتے ہوئے ترک وزیر خارجہ حاکان فیدان نے کہا کہ ترکیہ نے اسرائیل کے ساتھ کسی بھی قسم کے کاروبار اور تجارت کو ختم کرنے کا فیصلہ کیا ہے۔
انہوں نے کہا کہ اسرائیلی طیاروں کیلئے ترک فضائی حدود بھی بند کر دی گئی ہے۔۔ ترکیہ نے اپنی بندرگاہوں پر اسرائیلی بحری جہازوں کی آمد بھی روک دی ہے۔۔
انہوں نے مزید کہا کہ ترک قوم فلسطینیوں کے دکھ اور درد کا احساس رکھتی ہے اور ترکیے فلسطینیوں کو ان کی زمینوں سے بے دخل کرنے کے کسی بھی منصوبے کو مسترد کرتا ہے، چاہے یہ منصوبہ کسی کی بھی طرف سے پیش کیا جائے۔
ترک وزیر خارجہ کا کہنا ہے کہ اسرائیل کے خلاف یہ فیصلہ غزہ پٹی میں جاری نسل کشی، مغربی کنارے اور مقبوضہ بیت المقدس میں اسرائیل کے جارحانہ اقدامات کے خلاف ردعمل ہے۔
انہوں نے مزید کہا کہ امریکا کی لامحدود حمایت پر غزہ کی پٹی پر قبضے کا اسرائیلی منصوبہ دو ریاستی حل کو ناکام بنانے کی کوشش ہے۔
