ایشیا کپ میں پاکستان اور بھارت کے ہائی وولٹیج میچ سے قبل دبئی پولیس نے کرکٹ شائقین کو سخت وارننگ جاری کردی۔
پولیس حکام نے واضح کیا ہے کہ اسٹیڈیم میں کسی قسم کا تشدد، بدزبانی یا نسل پرستانہ رویہ ہرگز برداشت نہیں کیا جائے گا۔
دبئی پولیس کے ایونٹس سکیورٹی کمیٹی کے چیئرمین میجر جنرل سیف محیر المزروعی کے مطابق تشدد یا بدزبانی کرنے والوں کو ایک سے تین ماہ قید اور دس سے تیس ہزار درہم جرمانے کا سامنا کرنا پڑے گا جو پاکستانی کرنسی میں ساڑھے سات لاکھ سے 23 لاکھ روپے بنتا ہے۔
دبئی پولیس نے شائقین کو مشورہ دیا ہے کہ وہ کھیل کے دوران مثبت اور مہذب رویہ اپنائیں۔
دبئی پولیس کے مطابق خلاف ورزی کرنے والوں کے خلاف فوری قانونی کارروائی ہوگی تاکہ اسٹیڈیم کے ماحول اور شائقین کی حفاظت یقینی بنائی جا سکے۔
