راولپنڈی: 9 مئی کے مقدمات میں پی ٹی آئی کے 14 رہنماؤں کا اشتہار جاری کردیا۔
راولپنڈی کی انسداد دہشتگردی عدالت کے جج امجد علی شاہ نے ملزمان کا اشتہار جاری کیا اور اس پر 18 اکتوبر کو رپورٹ طلب کرلی۔
عدالت نے جن ملزمان کا اشتہار جاری کیا ان میں عمر ایوب،کنول شوذب، شیخ راشد شفیق، عظیم اللہ، زرتاج گل، رائے محمد مرتضیٰ، رائے حسن نواز، محمداحمد چٹھہ، محمدجاوید کے نام بھی شامل ہیں۔
اس کے علاوہ شبلی فراز، چوہدری آصف علی، چوہدری بلال اعجاز، شکیل احمدخان اور اشرف خان کے نام بھی اشتہار میں موجود ہے۔
ملزمان کا اشتہار تھانہ نیوٹاؤن، صادق آباد، سٹی، وارث خان، سول لائنز، تھانہ مورگاہ، ٹیکسلا، صدر واہ، کینٹ اور آر اے بازار میں درج مقدمات میں جاری کیا گیا ہے۔
قبل ازیں ملزمان کے ناقابل ضمانت وارنٹ گرفتاری جاری کیے گئے تھے مگر وارنٹ گرفتاری کی عدم تعمیل و عدم حاضری پر ملزمان کے اشتہار جاری کیے گئے ہیں۔
ان تمام 14 ملزمان کے خلاف اشتہار پر رپورٹ داخل ہونے پر ملزمان کو مفرور قرار دینے کی کارروائی کا آغاز کیا جائے گا۔
