بیروت — لبنان اور شام نے مشترکہ سرحدوں پر سیکیورٹی تعاون بڑھانے، منظم جرائم کے خاتمے، اور غیر قانونی نقل مکانی کو روکنے کے لیے نیا معاہدہ کر لیا ہے۔
یہ پیش رفت بیروت میں منعقدہ ایک اعلیٰ سطحی سیکیورٹی اجلاس کے دوران ہوئی، جس میں دونوں ممالک کے اعلیٰ عہدیداران شریک ہوئے۔
اجلاس میں شامی وفد کی قیادت نائب وزیر داخلہ میجر جنرل عبدالقادر طہان نے کی، جب کہ لبنانی وفد کی سربراہی انٹرنل سیکیورٹی فورسز (ISF) کے ڈائریکٹر جنرل میجر جنرل رائد عبداللہ اور جنرل سیکیورٹی کے سربراہ میجر جنرل حسن چوکیر نے کی۔
میجر جنرل طہان نے گفتگو کے دوران کہا کہ بات چیت نے ان رابطوں کو آگے بڑھایا جو سعودی عرب میں ہونے والی ملاقاتوں سے شروع ہوئے تھے، جن میں انسدادِ دہشت گردی، منشیات کی اسمگلنگ اور غیر قانونی نقل مکانی پر خصوصی توجہ دی گئی۔
انہوں نے کہا کہ "لبنان میں کوئی بھی سیکیورٹی خطرہ براہِ راست شام پر اثر انداز ہوتا ہے، اور اسی طرح شام کی سلامتی کے چیلنجز لبنان کے لیے بھی خطرہ بن سکتے ہیں، لہٰذا قریبی تعاون ناگزیر ہے۔”
لبنان کے ایک سیکیورٹی ذریعے نے الشرق الاوسط کو بتایا کہ بات چیت میں تمام اہم سیکیورٹی خدشات پر تفصیلی تبادلہ خیال کیا گیا۔
شامی وفد نے خاص طور پر منشیات کی اسمگلنگ اور سرحدی نیٹ ورکس کے خاتمے پر زور دیا، اور کہا کہ یہ مسئلہ دونوں ممالک کے لیے سماجی و سیکیورٹی خطرات کو بڑھا رہا ہے۔
انہوں نے انٹیلی جنس کے تبادلے اور فیلڈ کوآرڈینیشن کو مضبوط بنانے کے لیے عملی تجاویز بھی پیش کیں۔
لبنانی حکام نے اپنی جانب سے اسلحے اور انسانی اسمگلنگ پر گہری تشویش کا اظہار کیا اور کہا کہ کچھ غیر قانونی کراسنگ پوائنٹس مفرور گروہوں کی نقل و حرکت کے لیے استعمال ہو رہے ہیں۔
لبنانی وزارتِ داخلہ کے مطابق، شام کے ساتھ براہِ راست تعاون سرحدی علاقوں میں امن و استحکام کو برقرار رکھنے کے لیے ناگزیر ہے جہاں اسمگلنگ کی سرگرمیوں میں اضافہ دیکھا جا رہا ہے۔
دونوں ممالک نے انٹیلی جنس شیئرنگ، بارڈر مانیٹرنگ، اور مشترکہ کمیٹیوں کے قیام پر اتفاق کیا، تاکہ سرحدی خلاف ورزیوں پر فوری ردعمل ممکن بنایا جا سکے۔
اجلاس کا اختتام لبنانی وزیر داخلہ احمد الحجر اور شامی نائب وزیر داخلہ عبدالقادر طہان کی ملاقات پر ہوا۔
اس موقع پر وزیر داخلہ احمد الحجر نے کہا کہ "لبنان اور شام کے تعلقات تاریخی اور گہرے ہیں۔ یہ ملاقات دونوں ممالک کے درمیان حالیہ اعلیٰ سطحی روابط کی توسیع ہے۔”
انہوں نے مزید بتایا کہ یہ پیش رفت لبنانی صدر جوزف عون اور شامی صدر احمد الشرع کی بات چیت، وزیر اعظم نواف سلام کے دمشق کے دورے اور شامی وزیر خارجہ کے بیروت آنے کے بعد سامنے آئی ہے۔
About The Author
