واشنگٹن — امریکی سینیٹ نے ایک قرارداد کو مسترد کر دیا ہے جو صدر ڈونلڈ ٹرمپ کو کانگریس کی منظوری کے بغیر وینزویلا پر حملہ کرنے سے روک سکتی تھی۔
یہ فیصلہ جمعرات کو ہونے والی ووٹنگ میں سامنے آیا، جس میں 51 سینیٹرز نے مخالفت جبکہ 49 نے حمایت میں ووٹ دیا۔
قرارداد کا مقصد صدر ٹرمپ کے فوجی اختیارات کو محدود کرنا تھا، تاکہ وہ کانگریس کی اجازت کے بغیر کسی ملک پر حملہ نہ کر سکیں۔
تاہم، ریپبلکن سینیٹرز کی اکثریت نے اس اقدام کو صدر کے صوابدیدی اختیارات میں مداخلت قرار دیتے ہوئے مخالفت کی۔
یہ قرارداد ڈیموکریٹک سینیٹر ٹم کین (ورجینیا)، ایڈم شیف (کیلیفورنیا) اور ریپبلکن رینڈ پال (کینٹکی) کی جانب سے پیش کی گئی تھی۔
گزشتہ دو ماہ کے دوران جنوبی کیریبین میں امریکی افواج کی کارروائیوں کے نتیجے میں 16 حملوں میں 65 سے زائد افراد ہلاک ہوئے ہیں۔
امریکی حکومت نے ان حملوں کو منشیات اسمگلنگ میں ملوث "نشہ آور دہشت گردوں” کے خلاف قرار دیا، تاہم ثبوت یا تفصیلات فراہم نہیں کی گئیں۔
یہ فوجی کارروائیاں اس خدشے کو بڑھا رہی ہیں کہ ٹرمپ انتظامیہ براہ راست وینزویلا پر حملہ کرنے کی تیاری کر رہی ہے، حالانکہ حکام اس تاثر کی تردید کر رہے ہیں۔
سیکریٹری آف اسٹیٹ مارکو روبیو اور وزیر دفاع پیٹ ہیگستھ نے کانگریس کے رہنماؤں کو بریفنگ دیتے ہوئے یقین دلایا کہ فی الحال وینزویلا کی سرزمین پر حملے کا کوئی منصوبہ نہیں۔
تاہم، کئی سینیٹرز کا کہنا ہے کہ صدر ٹرمپ کی غیر متوقع اور جارحانہ طرزِ عمل کے پیش نظر صورتحال تیزی سے بدل سکتی ہے۔
ڈیموکریٹک سینیٹر مارک وارنر نے کہا کہ “قانونی رائے میں وینزویلا پر حملے کا کوئی ذکر نہیں، اس لیے انتظامیہ کے پاس واضح قانونی جواز موجود نہیں ہے۔”
امریکی آئین کے مطابق، کسی بھی صدر کو طویل فوجی آپریشن شروع کرنے سے قبل کانگریس کی منظوری حاصل کرنا لازم ہے۔
ڈیموکریٹک رہنما چک شومر نے سینیٹ میں کہا “وقت آگیا ہے کہ کانگریس اپنی آئینی ذمہ داری پوری کرے اور صدر کو غیر محدود جنگی اختیارات سے روکے۔”
تاہم، سینیٹ کی خارجہ تعلقات کمیٹی کے چیئرمین جم رِش نے کہا کہ “کمانڈر انچیف کے طور پر صدر ٹرمپ کے پاس وہ اختیار ہے جس کی انہیں ضرورت ہے، اور ہمیں ان کے فیصلوں پر بھروسہ کرنا چاہیے۔”
قانونی ماہرین کا کہنا ہے کہ وینزویلا کے خلاف ممکنہ حملہ بین الاقوامی قوانین اور امریکی داخلی قانون دونوں کی خلاف ورزی ہو سکتا ہے، خاص طور پر قتل اور فوجی مداخلت پر عائد قانونی پابندیوں کے تناظر میں۔
About The Author
