کوئٹہ — پاکستان کے معروف موٹر اسپورٹس اسٹنٹ مین سلطان محمد گولڈن نے عالمی سطح پر ایک اور تاریخی کامیابی حاصل کرتے ہوئے دو نئے ورلڈ ریکارڈز اپنے نام کر لیے، جس پر ملک بھر میں خوشی اور فخر کی لہر دوڑ گئی ہے۔
سلطان گولڈن نے بلوچستان کے دارالحکومت کوئٹہ میں منعقدہ ایک خصوصی تقریب کے دوران دنیا کی تیز ترین ریورس ڈرائیونگ کا عالمی ریکارڈ قائم کیا۔ انہوں نے ایک میل (تقریباً 1.6 کلومیٹر) کا فاصلہ محض 57 سیکنڈز میں ریورس گیئر میں طے کر کے سابقہ عالمی ریکارڈ توڑ دیا۔ اس سے قبل یہ ریکارڈ ایک امریکی اسٹنٹ ڈرائیور کے پاس تھا، جس نے یہی فاصلہ 1 منٹ 15 سیکنڈ میں مکمل کیا تھا۔
اسی تقریب میں سلطان گولڈن نے ایک اور سنسنی خیز کارنامہ انجام دیتے ہوئے ریورس ریمپ جمپ میں بھی نیا عالمی ریکارڈ قائم کیا۔ انہوں نے گاڑی کو پیچھے کی سمت میں دوڑاتے ہوئے 121.72 فٹ طویل جمپ لگا کر دنیا بھر میں سب سے طویل ریورس ریمپ جمپ کا اعزاز حاصل کر لیا، جو اس سے قبل قائم 89 فٹ کے ریکارڈ سے کہیں زیادہ ہے۔
ماہرین کے مطابق ریورس ڈرائیونگ اور ریمپ جمپ جیسے اسٹنٹس نہ صرف غیر معمولی مہارت بلکہ اعصاب کی مضبوطی اور برسوں کی محنت کا تقاضا کرتے ہیں۔ سلطان گولڈن نے اس کامیابی کے ذریعے ثابت کیا کہ پاکستانی نوجوان عالمی سطح پر کسی سے کم نہیں۔
سلطان گولڈن اس سے قبل بھی موٹر اسپورٹس کے مختلف شعبوں میں کئی عالمی ریکارڈ قائم کر چکے ہیں، تاہم ان کے تازہ ترین کارنامے کو پاکستان کی اسپورٹس ہسٹری میں ایک اہم سنگِ میل قرار دیا جا رہا ہے۔ عوامی اور سرکاری سطح پر مطالبہ کیا جا رہا ہے کہ ایسے باصلاحیت کھلاڑیوں کی سرپرستی کی جائے تاکہ وہ مستقبل میں بھی عالمی سطح پر پاکستان کا نام روشن کرتے رہیں۔
About The Author
