امریکا میں برفانی طوفان ’’ڈیوِن‘‘ سے نظامِ زندگی مفلوج، سینکڑوں پروازیں منسوخ، نیویارک میں ایمرجنسی نافذ
نیویارک / واشنگٹن — امریکا میں شدید برفانی طوفان ’’ڈیوِن‘‘ نے معمولاتِ زندگی کو بری طرح متاثر کر دیا ہے، جس کے باعث مختلف ریاستوں میں ہنگامی اقدامات کیے جا رہے ہیں۔ سب سے زیادہ متاثر ہونے والی ریاست نیویارک میں گورنر نے ایمرجنسی نافذ کر دی ہے۔
ریاست نیویارک کے مختلف علاقوں میں 6 سے 8 انچ تک برفباری ریکارڈ کی گئی ہے، جس سے سڑکوں، ٹرانسپورٹ اور فضائی آپریشنز شدید متاثر ہوئے۔ جان ایف کینیڈی انٹرنیشنل ایئرپورٹ پر ڈیڑھ سو سے زائد پروازیں منسوخ کر دی گئی ہیں، جب کہ رن ویز پر برف اور شدید پھسلن کے باعث طیاروں کو لینڈنگ میں سنگین مشکلات کا سامنا ہے۔
پنسلوینیا میں برفباری، کیلیفورنیا میں سیلاب کے اثرات برقرار
پنسلوینیا میں بھی شدید برفباری کے باعث ٹریفک کی روانی متاثر ہے اور متعدد علاقوں میں روزمرہ سرگرمیاں محدود ہو کر رہ گئی ہیں۔ حکام نے شہریوں کو غیر ضروری سفر سے گریز کی ہدایت کی ہے۔
دوسری جانب کیلیفورنیا میں حالیہ سیلاب کے بعد بحالی کا عمل جاری ہے۔ امدادی ادارے شہری علاقوں سے ملبہ ہٹانے، سڑکوں کی بحالی اور متاثرہ انفرااسٹرکچر کو درست کرنے میں مصروف ہیں، جب کہ متعدد علاقوں میں ایمرجنسی سروسز الرٹ پر ہیں۔
شہریوں کو احتیاطی تدابیر اختیار کرنے کی ہدایت
امریکی حکام نے شہریوں کو شدید موسمی حالات کے پیش نظر احتیاطی تدابیر اختیار کرنے، سرکاری ہدایات پر عمل کرنے اور غیر ضروری سفر سے گریز کرنے کی اپیل کی ہے۔ محکمہ موسمیات کے مطابق آئندہ چند دنوں میں مزید سردی اور برفباری کے امکانات موجود ہیں۔
About The Author
