افغان طالبان کی جانب سے پاک افغان سرحد پر بلااشتعال کارروائی کا فوری اور مؤثر جواب دیا گیا۔
وزارت اطلاعات کے مطابق افغان طالبان نے پاک افغان سرحد کے متعدد مقامات پر بلااشتعال فائرنگ کی، جس کا پاکستان کی سیکیورٹی فورسز کی جانب سے فوری اور مؤثر جواب دیا جا رہا ہے۔
بیان کے مطابق چترال، خیبر، مہمند، کرم اور باجوڑ کے سیکٹرز میں طالبان فورسز کو منہ توڑ جواب دیا گیا ہے۔ ابتدائی اطلاعات کے مطابق افغان طالبان رجیم کو بھاری جانی نقصان ہوا ہے جبکہ متعدد چوکیاں اور سازوسامان تباہ کر دیے گئے ہیں۔
ترجمان کے مطابق پاکستان اپنی علاقائی سالمیت اور اپنے شہریوں کی حفاظت و سلامتی کو یقینی بنانے کے لیے ہر ضروری اقدام اٹھائے گا۔
سیکیورٹی ذرائع کے مطابق افغان طالبان نے پاک،افغان سرح کےمختلف مقامات پر فائرنگ کی، فورسز بلااشتعال جارحیت کامنہ توڑجواب دےرہی ہیں، جوابی کارروائی سے افغان طالبان کے ٹھکانے تباہ،خوارج بھاگ کھڑے ہوئے۔ چترال سیکٹر پر افغان طالبان کی چیک پوسٹ کو پاکستانی فورسز نے تباہ کردیا۔
پاکستانی فورسز نے ناوگئی سیکٹر باجوڑ، تیراہ خیبر، مہمند،ارندوسیکٹر پربھرپور جواب دیا۔ سیکیورٹی فورسز نے باجوڑ میں افغانستان کی 2 چوکیاں تباہ کردیں۔
سیکیورٹی ذرائع کا کہنا ہے کہ پاک افغان سرحد پر افغان طالبان رجیم کی بلااشتعال کارروائیوں کے خلاف پاکستان کا آپریشن غضب للحق جاری ہے، چن چن کر افغان طالبان رجیم کی پوسٹوں کو نشانہ بنایا جا رہا ہے۔
ذرائع کے مطابق سیکیورٹی فورسز کی جانب سے چھوٹے اور بڑے ہتھیاروں سے گولہ باری جاری ہے، افغان طالبان رجیم کے 44 اہلکاروں کے ہلاک ہونے کی اطلاعات ہیں۔ ڈرونز کے ذریعے چن چن کرطالبان ریجیم کی پوسٹوں کونشانہ بنایا جارہا ہے۔
