پاکستانی شوبز انڈسٹری کی معروف اداکارہ میرا نے انکشاف کیا ہے کہ انہیں بالی ووڈ کے سپر اسٹار شاہ رخ خان کے ساتھ مرکزی کردار ادا کرنے کی پیشکش ہوئی تھی، تاہم مختلف وجوہات کی بنا پر وہ اس فلم کا حصہ نہ بن سکیں۔
اداکارہ میرا ان دنوں اپنی نئی فلم سائیکو کی تشہیری مہم میں مصروف ہیں، جو عید الاضحیٰ کے موقع پر ریلیز کی جا رہی ہے۔ فلم کی پروموشن کے دوران ایک نجی ٹی وی پروگرام میں گفتگو کرتے ہوئے انہوں نے اپنے کیریئر سے متعلق ایک دلچسپ انکشاف کیا۔
میرا کے مطابق انہیں معروف بھارتی فلم ساز یش چوپڑا کی فلم جب تک ہے جان میں شاہ رخ خان کے مقابل مرکزی کردار کی پیشکش کی گئی تھی۔ انہوں نے کہا کہ بعض ذاتی اور پیشہ ورانہ مسائل کے باعث وہ اس فلم میں کام نہ کر سکیں، جس کے بعد یہ کردار بھارتی اداکارہ کترینہ کیف کو دے دیا گیا۔
اداکارہ نے بتایا کہ اس وقت بالی ووڈ میں پاکستانی فنکاروں کے لیے بھی مواقع موجود تھے اور وہ اس پروجیکٹ کا حصہ بننے کے لیے پرجوش تھیں، تاہم حالات ان کے حق میں سازگار ثابت نہ ہو سکے۔
واضح رہے کہ “جب تک ہے جان” 2012 میں ریلیز ہونے والی ایک رومانوی فلم تھی جس میں شاہ رخ خان، کترینہ کیف اور انوشکا شرما نے مرکزی کردار ادا کیے تھے۔ یہ فلم یش چوپڑا کی آخری ہدایت کاری بھی تھی اور باکس آفس پر کامیاب ثابت ہوئی تھی۔
ادھر میرا کی نئی فلم “سائیکو” بھی شائقین کی توجہ کا مرکز بنی ہوئی ہے، جبکہ اداکارہ مختلف انٹرویوز میں اپنی ذاتی اور پیشہ ورانہ زندگی سے متعلق دلچسپ انکشافات کر رہی ہیں۔
About The Author
