پاکستان ویمنز کرکٹ ٹیم آئی سی سی ویمنز ٹی ٹوئنٹی ورلڈ کپ 2026 کی تیاریوں کے سلسلے میں اپنا دوسرا اور آخری وارم اپ میچ منگل کو اسکاٹ لینڈ کے خلاف کھیلے گی۔
اطلاعات کے مطابق قومی ویمنز اسکواڈ اس وقت انگلینڈ کے شہر نوٹنگھم میں موجود ہے، جہاں کھلاڑیاں میگا ایونٹ سے قبل بھرپور تربیت اور پریکٹس سیشنز میں حصہ لے رہی ہیں۔ اتوار کے روز بھی ٹیم نے جسمانی فٹنس اور مہارتوں کو بہتر بنانے پر خصوصی توجہ دی۔
پاکستان ویمنز ٹیم اپنے پہلے وارم اپ میچ میں سری لنکا کے خلاف خاطر خواہ کارکردگی دکھانے میں ناکام رہی تھی اور اسے 9 وکٹوں سے شکست کا سامنا کرنا پڑا تھا۔ اسکاٹ لینڈ کے خلاف میچ کے بعد قومی ٹیم ورلڈ کپ میں شرکت کے لیے برمنگھم روانہ ہو جائے گی۔
ورلڈ کپ سے قبل پاکستان نے میزبان آئرلینڈ اور ویسٹ انڈیز کے ساتھ ٹرائی نیشن سیریز میں بھی شرکت کی تھی، تاہم قومی ٹیم ابتدائی دونوں میچز ہار گئی تھی جبکہ بعد کے دو مقابلے بارش کے باعث منسوخ ہو گئے تھے۔
یاد رہے کہ 12 جون سے انگلینڈ اور Wales میں شروع ہونے والے آئی سی سی ویمنز ٹی ٹوئنٹی ورلڈ کپ 2026 میں پاکستان ٹیم کی قیادت فاطمہ ثنا کریں گی۔
پاکستانی اسکواڈ میں فاطمہ ثنا، عالیہ ریاض، عائشہ ظفر، ڈیانا بیگ، ایمان فاطمہ، گل فیروزہ، ارم جاوید، منیبہ علی صدیقی، نشرہ سندھو، نتالیہ پرویز، رمین شمیم، سعدیہ اقبال، سائرہ جبین، تسمیہ رباب اور طوبیٰ حسن شامل ہیں۔
قومی ٹیم ورلڈ کپ مہم کا آغاز 14 جون کو برمنگھم میں روایتی حریف بھارت کے خلاف کرے گی۔ اس کے بعد پاکستان 17 جون کو ساؤتھ کوریا، 20 جون کو بنگلا دیش، 23 جون کو آسٹریلیا اور 27 جون کو نیدرلینڈ کے خلاف میدان میں اترے گا۔
About The Author
