بھارتی فضائیہ کا ایک اے این-32 فوجی طیارہ ریاست آسام کے شہر جورہاٹ میں لینڈنگ کے دوران حادثے کا شکار ہو گیا، جس کے نتیجے میں طیارے میں آگ بھڑک اٹھی اور 5 اہلکار ہلاک ہو گئے۔
بھارتی فضائیہ کے مطابق حادثہ جورہاٹ میں واقع فضائیہ کے ایئر بیس پر پیش آیا، جہاں طیارہ لینڈنگ کے مرحلے میں تھا۔ حادثے کے فوراً بعد طیارے کو شدید آگ نے اپنی لپیٹ میں لے لیا، جس سے جہاز میں سوار عملے کو شدید نقصان پہنچا۔
سرکاری بیان کے مطابق حادثے میں 5 اہلکار جان کی بازی ہار گئے، جبکہ کو پائلٹ زندہ بچ گیا۔ زخمی کو پائلٹ کو فوری طور پر طبی امداد کے لیے قریبی اسپتال منتقل کر دیا گیا، جہاں اس کا علاج جاری ہے۔
بھارتی فضائیہ کا کہنا ہے کہ حادثے کی اطلاع ملتے ہی فائر فائٹنگ اور ریسکیو ٹیموں کو موقع پر روانہ کیا گیا، جنہوں نے آگ پر قابو پانے اور امدادی کارروائیاں مکمل کرنے میں حصہ لیا۔
واقعے کے بعد بھارتی فضائیہ نے حادثے کی وجوہات جاننے کے لیے کورٹ آف انکوائری تشکیل دینے کا اعلان کیا ہے۔ تحقیقاتی ٹیم طیارے کے تکنیکی پہلوؤں، لینڈنگ کے حالات اور دیگر ممکنہ عوامل کا تفصیلی جائزہ لے گی۔
About The Author
