سفیر پاکستان کی چیچن رہنما سے ملاقات، دوطرفہ تعاون مضبوط بنانے پر اتفاق -

ملاقات کے دوران تعلیم، ثقافتی تبادلوں، انسانی ہمدردی اور ادارہ جاتی روابط کو مزید وسعت دینے پر اتفاق کیا گیا۔

سفیر پاکستان فیصل نیاز ترمذی نے کہا کہ پاکستان اور چیچنیا کے عوام کے درمیان مذہبی اقدار، روایات اور سماجی ڈھانچے میں گہری مماثلت پائی جاتی ہے، چیچنیا میں اذان کی آواز سن کر انہیں اپنے وطن جیسا احساس ہوتا ہے، جو دونوں معاشروں کے درمیان روحانی اور ثقافتی قربت کو مزید واضح کرتا ہے۔

ان کا کہنا تھا کہ پاکستان چیچن ریپبلک کے ساتھ تعلیم، ثقافت اور انسانی تعاون کے شعبوں میں تعلقات کو مزید آگے بڑھانے کا خواہاں ہے، اور موجودہ روابط کو عملی تعاون میں تبدیل کرنے کیلئے مثبت پیش رفت جاری ہے۔

چیچن ریپبلک کے سربراہ رمضان قادروف نے پاکستان کے ساتھ تعلقات کو انتہائی مثبت اور دوستانہ قرار دیتے ہوئے کہا کہ پاکستان ایک اہم مسلم ملک ہے جس کے ساتھ تعاون کو مزید فروغ دینے کی گنجائش موجود ہے۔

انہوں نے کہا کہ چیچنیا پاکستان کے ساتھ تعلیمی اور ثقافتی روابط کو وسعت دینے میں خصوصی دلچسپی رکھتا ہے، رمضان قادروف نے پاکستان کے عوام کیلئے نیک خواہشات کا اظہار کرتے ہوئے دونوں ممالک کے درمیان قریبی تعلقات کی ضرورت پر زور دیا۔

دورے کے دوران سفیر پاکستان فیصل نیاز ترمذی نے چیچن ریپبلک کے پہلے صدر اور روس کے ہیرو اخمت حاجی قادروف کی قبر پر حاضری دی، جہاں انہوں نے مرحوم رہنما کی خدمات اور سیاسی کردار کو خراج عقیدت پیش کیا اور ان کیلئے دعائے مغفرت کی۔

مبصرین کے مطابق یہ ملاقات اور دورہ پاکستان اور چیچن ریپبلک کے درمیان بڑھتے ہوئے سفارتی اور ثقافتی تعلقات کی عکاسی کرتا ہے، جس سے مستقبل میں مختلف شعبوں میں تعاون کو مزید فروغ ملنے کی توقع ہے۔