ترجمان دفتر خارجہ نے بیان جاری کرتے ہوئے کہا ہے کہ ایرانی صدر کل پاکستان کا دورہ کریں گے،جس دوران وہ قیادت سے دوطرفہ تعلقات پر تبادلہ خیال کریں گے۔
ترجمان کے مطابق ایرانی صدرمسعود پزشکیان صدر اور وزیراعظم سے ملاقاتیں کریں گے۔
ذرائع کا کہناہے کہ امریکا اور ایران کے درمیان پاکستانی ثالثی پر وزیراعظم کا شکریہ ادا کیا جائے گا، دوطرفہ تعلقات، باہمی تعاون اور اعلیٰ سطح کے رابطوں کے فروغ پر تبادلہ خیال کیا جائے گا۔
ملاقاتوں میں دوطرفہ اقتصادی تعاون کے سابق معاہدوں پر پیشرفت اور عملدرآمد کا بھی جائزہ لیا جائے گا۔ خطے کی مجموعی صورتحال،باہمی تعاون اور مشترکہ مفادات کے امور بھی زیر غور آئیں گے۔
وزیراعظم شہباز شریف
وزیراعظم شہباز شریف کا کہنا ہے کہ مثبت اور تعمیری ماحول میں امریکا اور ایران کے درمیان ’اسلام آباد مفاہمتی یادداشت‘ کے تحت سوئٹزرلینڈ میں پہلا مذاکراتی دور کامیابی کے ساتھ مکمل ہو گیا ہے۔
ایک بیان میں شہباز شریف کا کہنا تھا کہ بات چیت میں حوصلہ افزا پیش رفت ہوئی ہے جس میں حتمی معاہدے کے لیے 60 روزہ روڈ میپ پر اتفاق ہوا ہے۔
وزیرِ اعظم شہباز شریف کا کہنا تھا کہ سوئٹزرلینڈ مذاکرات کے دوران اعلی سطح کی کمیٹی کے قیام پر بھی اتفاق ہوا ہے جو سیاسی نگرانی اور مزید تکنیکی مذاکرات کی راہ ہموار کرے گی۔
وزیرِ اعظم شہباز شریف کا کہنا تھا کہ میں امریکا اور ایران دونوں کی قیادت کی جانب سے تعمیری بات چیت کے مسلسل عزم کی ستائش کرتا ہوں اور اس تاریخی عمل کو آگے بڑھانے میں تمام برادر اور دوست ممالک کی حمایت کا شکریہ ادا کرتا ہوں۔
شہباز شریف کا کہنا تھا کہ وہ خاص طور پر برادر ملک قطر کے شکرگزار ہیں جس نے ان مذاکرات کو آگے بڑھانے کے لیے سازگار حالات کے لیے تعاون کیا اور ان مذاکرات کی میزبانی میں سہولت فراہم کرنے پر سوئس حکومت کا بھی شکریہ ادا کرتا ہوں۔
اُن کا کہنا تھا میں خاص طور پر فیلڈ مارشل عاصم منیر کا شکرگزار ہوں، جن کی انتھک کوششوں سے یہ مذاکرات کامیاب ہوئے۔ ان کی لگن، عزم اور استقامت واقعی قابل ستائش ہے جس کے بغیر کوئی پیش رفت نہیں ہو سکتی تھی۔
شہباز شریف کا کہنا تھا کہ میں نائب وزیر اعظم اسحاق ڈار کا دفتر خارجہ میں اپنی ٹیم کے ساتھ سفارتی کوششوں پر دل کی گہرائیوں سے تعریف اور شکریہ ادا کرنا چاہتا ہوں۔ میں وزیر داخلہ محسن نقوی کی محنت کو بھی دل کی گہرائیوں سے سراہتا ہوں جنھوں نے ان مذاکرات کی کامیابی میں بھرپور تعاون کیا۔
وزیراعظم شہباز شریف کا مزید کہنا تھا کہ پاکستان مذاکرات اور سفارت کاری کو پرامن اور دیرپا حل کی جانب آگے بڑھانے میں اپنا مخلصانہ کردار ادا کرتا رہے گا۔
About The Author
