امریکا سے مذاکرات کا فیصلہ نہیں ہوا، پاکستان اور قطرپیغامات پہنچا رہے ہیں، عراقچی -

ایرانی وزیر خارجہ عباس عراقچی نے کہا ہے کہ امریکا کے ساتھ مذاکرات دوبارہ شروع کرنے کا ابھی کوئی فیصلہ نہیں ہوا۔ انہوں نے کہا کہ پاکستان اور قطر ایران کے ساتھ رابطے میں ہیں اور پیغامات کا تبادلہ جاری ہے۔ تاہم، ان رابطوں کو مذاکرات نہیں کہا جا سکتا۔

ایرانی اسٹوڈنٹ نیوز ایجنسی کے مطابق عباس عراقچی نے موجودہ سفارتی رابطوں پر بات کی۔ انہوں نے واضح کیا کہ تہران اور واشنگٹن کے درمیان اس وقت براہ راست مذاکرات نہیں ہو رہے۔

عراقچی کے مطابق پاکستان اور قطر ایران کے ساتھ رابطے میں ہیں۔ دونوں ممالک مختلف پیغامات کے تبادلے میں کردار ادا کر رہے ہیں۔

تاہم، ایرانی وزیر خارجہ نے کہا کہ یہ رابطے باقاعدہ مذاکرات کے مترادف نہیں ہیں۔ ایران اور امریکا کے درمیان براہ راست بات چیت کی بحالی کا فیصلہ بھی ابھی نہیں کیا گیا۔

پاکستان اور قطر پہلے بھی ایران اور امریکا کے درمیان کشیدگی کم کرنے کی سفارتی کوششوں میں رابطہ کاری کرتے رہے ہیں۔ حالیہ صورتحال میں بھی دونوں ممالک کے رابطے اہم سمجھے جا رہے ہیں۔

دوسری جانب ایران کے نائب وزیر خارجہ کاظم غریب آبادی نے امریکا کو آبنائے ہرمز کے معاملے پر سخت جواب دیا ہے۔

انہوں نے امریکی صدر ڈونلڈ ٹرمپ کے حالیہ بیان پر ردعمل دیتے ہوئے کہا کہ تہران امریکی دھمکیوں یا طاقت کے مظاہرے سے خوفزدہ نہیں ہوگا۔

غریب آبادی نے سوشل میڈیا پلیٹ فارم ایکس پر کہا کہ آبنائے ہرمز ایک اہم تزویراتی آبی گزرگاہ ہے۔ ان کے مطابق اس کے کھولنے یا بند کرنے کا فیصلہ ایران کے اختیار میں ہے۔