آبنائے ہرمز صرف ایران کے اختیار میں ہے، امریکی دھمکیوں سے نہیں ڈریں گے: ایرانی نائب وزیر خارجہ -

ایران کے نائب وزیر خارجہ کاظم غریب آبادی نے کہا ہے کہ ایران امریکی صدر ڈونلڈ ٹرمپ کی دھمکیوں سے خوفزدہ نہیں ہوگا۔ انہوں نے کہا کہ آبنائے ہرمز ایران کے کنٹرول میں رہے گی۔ اس آبنائے کو بند یا کھولنے سے متعلق فیصلے صرف ایران کرے گا۔

ایرانی میڈیا رپورٹس کے مطابق غریب آبادی نے ٹرمپ کے حالیہ بیان پر ردعمل دیا ہے۔ ٹرمپ نے آبنائے ہرمز کو امریکی علاقہ قرار دینے کی بات کی تھی۔کاظم غریب آبادی نے سوشل میڈیا پلیٹ فارم ایکس پر اپنے بیان میں کہا کہ آبنائے ہرمز کو کسی ٹویٹ سے قبضے میں نہیں لیا جا سکتا۔

انہوں نے کہا کہ طیارہ بردار بحری جہاز بھی اس حقیقت کو تبدیل نہیں کر سکتے۔ ان کے مطابق کسی حکم یا انتخابی تقریر سے بھی آبنائے ہرمز کی حیثیت تبدیل نہیں ہوگی۔ ایرانی نائب وزیر خارجہ نے امریکا کو اپنی حکمت عملی پر نظرثانی کا مشورہ بھی دیا۔

غریب آبادی نے دعویٰ کیا کہ امریکا کو اب تک اسٹریٹجک اور بھاری شکستوں کا سامنا کرنا پڑا ہے۔انہوں نے کہا کہ امریکا کو اس حقیقت کو تسلیم کرنا ہوگا۔ ان کے مطابق واشنگٹن کو اپنی موجودہ پالیسی کے نتائج پر بھی غور کرنا چاہیے۔ ایرانی نائب وزیر خارجہ نے کہا کہ آبنائے ہرمز ایرانیوں کی تھی، ایرانیوں کی ہے اور ایرانیوں کی ہی رہے گی۔