یورپی یونین روس کے خلاف پابندیوں میں مزید نمایاں توسیع کی تیاری کر رہی ہے۔ یورپی یونین کی خارجہ پالیسی کی سربراہ کاجا کالس نے کہا ہے کہ نیا پیکج موسم خزاں میں پیش کیا جائے گا۔ کاجا کالس نے جرمن اخبار Welt کو انٹرویو دیتے ہوئے کہا کہ نئی پابندیاں روس کے خلاف جنگ شروع ہونے کے بعد اب تک کی سب سے دور رس پابندیاں ہوں گی۔
کالس کے مطابق یورپی یونین کی موجودہ پابندیوں نے روس کو پہلے ہی بھاری مالی نقصان پہنچایا ہے۔انہوں نے دعویٰ کیا کہ ان پابندیوں کے باعث روسی جنگی مشین کو تقریباً 1 ٹریلین یورو کا نقصان ہوا ہے۔کالس نے کہا کہ نئے اقدامات کا مقصد ماسکو پر مزید دباؤ بڑھانا ہے۔ ان کے مطابق روس کو اس وقت تک دباؤ کا سامنا رہنا چاہیے جب تک وہ جنگ ختم نہیں کرتا۔
یورپی یونین کی خارجہ پالیسی سربراہ نے کہا کہ نئے اقدامات منظور ہونے کے بعد پابندیوں کا شکار روسی اداروں کی مجموعی تعداد میں تقریباً ایک تہائی اضافہ ہو جائے گا۔انہوں نے تاہم نئے پیکج کی حتمی تفصیلات ظاہر نہیں کیں۔ اس کے علاوہ انہوں نے یہ بھی نہیں بتایا کہ یورپی یونین اسے موسم خزاں میں کس تاریخ کو پیش کرے گی۔
یورپی یونین نے گزشتہ ماہ روس کے خلاف پابندیوں کے ایک نئے پیکج کی منظوری دی تھی۔ان اقدامات میں روس کے بینکاری شعبے اور کرپٹو کرنسی نیٹ ورکس کو نشانہ بنایا گیا تھا۔یورپی یونین روس پر اس وقت سے مسلسل اقتصادی دباؤ بڑھا رہی ہے جب روس نے یوکرین کے خلاف جنگ شروع کی۔
About The Author
