پشاور کے علاقے گڑھی شیرداد ورسک میں دہشت گردوں کے خلاف انٹیلی جنس بیسڈ آپریشن کے دوران ایک خودکش بمبار ہلاک ہوگیا جب کہ فائرنگ کے تبادلے میں ایک پولیس اہلکار شہید اور 3 زخمی ہوگئے۔
سی ٹی ڈی کے مطابق تین خودکش بماروں کی پشاور میں داخل ہونے اور ایک حساس تنصیب کو نشانہ بنانے کی تیاری کی خفیہ اطلاع تھی، جس پر سی ٹی ڈی نے گڑھی شیرداد ورسک میں علاقے کا موثرمحاصرہ کیا اور دہشت گردوں کے خلاف آپریشن کیا، اس دوران ڈرون کے ذریعے نگرانی کی گئی۔
سی ٹی ڈی کے مطابق افغان خودکش بمبار سانگری نے عمارت کی چھت پر جا کر فرار ہونے کی کوشش کی اور سی ٹی ڈی اہلکاروں پر فائرنگ کی، فائرنگ کے تبادلے میں دہشت گرد سانگری مارا گیا جب کہ اس کے دو ساتھی فرار ہوگئے جن کی گرفتاری کے لیے کوششیں جاری ہیں۔
سی ٹی ڈی کے مطابق فائرنگ کے تبادلے میں پولیس کانسٹیبل آفاق شہید اور تین اہلکار زخمی ہوگئے۔ ہلاک خودکش بمبار سے 3 دستی بم برآمد ہوئے ہیں۔
About The Author
