پاکستان کے صدر آصف علی زرداری نے دبئی میں جہاز سے اترتے ہوئے زخمی ہونے پر چین کے صدر شی جن پنگ کے جذبہ خیر سگالی اور ان کی تشویش پر شکریہ ادا کیا،،
چینی صدر کے خیر سگالی پیغام پر آصف علی زرداری نے کہا کہ مناسب وقت پر مستقبل قریب میں چین کا دورہ کروں گا،، چین کی قیادت اور عوام کی جانب سے صحتیابی کے پیغامات سے متاثر ہوا، مستقبل قریب میں مناسب تاریخ پر چین کا دورہ کروں گا۔
انہوں نے کہا کہ دورے سے دونوں ممالک کے درمیان دیرینہ، آہنی بندھن کو مزید تقویت ملے گی۔
چینی صدر نے 3 نومبر کے خط میں صدر زرداری کے زخمی ہونے پر اظہار تشویش کیا تھا، چینی صدر نے آصف علی زرداری کی جلد صحتیابی کے لیے نیک خواہشات کا اظہار کیا تھا۔ شی جن پنگ نے خط میں صدر زرداری کو دورہ چین کی گرمجوشی سےدعوت دی تھی۔
واضح رہے کہ 30 اکتوبر کو صدر پاکستان آصف علی زرداری دبئی ایئرپورٹ پر جہاز سے اترتے ہوئے حادثے کا شکار ہوگئے تھےاور جہاز سے اترتے ہوئے ان کے پاؤں میں فریکچر ہوگیا تھا۔
صدر آصف علی زرداری کو فوری طور پرابتدائی طبی امداد کے لیے ہسپتال منتقل کیا گیا تھا، جہاں ڈاکٹرز نے معائنے کے بعد ان کے پاؤں پر پلاسٹر کردیا تھا۔
صدر مملکت آصف زرداری کا 4 سے 7 نومبر تک چین کا دورہ طے تھا، دورے کے دوران انہیں چینی صدر شی جن پنگ سے بھی ملاقات کرنی تھی، صدر زرداری کو 5 نومبر کو شنگھائی عالمی نمائش میں بھی شرکت ہونا تھا، تاہم وہ چین کے دورے پر نہیں جاسکے تھے۔
