این سی سی آئی اے لاہور نے ماڈل ٹاؤن لنک روڈ، لنک آرکیڈ پلازہ میں غیر قانونی موبلٹی/ٹیلی مارکیٹنگ کال سینٹر پر چھاپہ مارا۔
مذکورہ کال سینٹر کے ذریعے برطانیہ کے شہریوں کو معروف ٹیلی کمیونیکیشن کمپنیوں Tesco، Vodafone اور O2 کے نمائندے ظاہر کرکے جعلی موبائل اپ گریڈز، سم اونلی پیکجز اور نیٹ ورک ڈیلز کی پیشکش کے ذریعے مبینہ فراڈ کیا جا رہا تھا۔
کارروائی کے دوران ڈائلر سافٹ ویئر کے ذریعے غیر ملکی شہریوں کو مبینہ طور پر دھوکہ دہی پر مبنی کالز کرتے ہوئے 6 خواتین سمیت 8 افراد کو حراست میں لیا گیا۔
چھاپے کے دوران 3 لیپ ٹاپ، 8 کمپیوٹر سی پی یوز، 2 موبائل فونز اور مبینہ غیر قانونی سرگرمیوں سے متعلق ڈیجیٹل ڈیٹا قبضے میں لے لیا گیا۔
تحقیقات کے دوران دو افراد کے مبینہ سہولت کار کے طور پر کردار کی بھی نشاندہی کی گئی ہے۔ بلال جٹ پر کال سینٹر کے لیے خواتین اسٹاف اور کمپیوٹر آلات فراہم کرنے جبکہ علی رضا پر ڈائلر سافٹ ویئر، صارفین کا ڈیٹا اور مبینہ فراڈ کی رقم منتقل کرنے کے ذرائع فراہم کرنے کا الزام ہے۔
این سی سی آئی اے کی جانب سے غیر قانونی کال سینٹرز اور بیرونِ ملک شہریوں کو نشانہ بنانے والے فراڈ نیٹ ورکس کے خلاف کریک ڈاؤن جاری ہے۔

