پنجاب کی سینئر وزیر مریم اورنگزیب نے پاکستان فلم پروڈیوسرز ایسوسی ایشن کے نو منتخب عہدیداروں سے حلف لیا۔ تقریب لاہور کے ایک مقامی ہوٹل میں منعقد ہوئی۔تقریب میں فلمی صنعت کی نمایاں شخصیات نے شرکت کی۔ معروف اداکارہ بشریٰ انصاری نے میزبانی کے فرائض انجام دیے۔
مریم اورنگزیب نے نو منتخب چیئرمین میاں امجد فرزند سے حلف لیا۔ وائس چیئرمین عزیز جہانگیری نے بھی حلف اٹھایا۔دیگر عہدیداروں اور ارکان میں ذوالفقار علی مانا، جونی ملک، فیاض خان اور حسن نعیم شامل تھے۔ جاوید وڑائچ اور عاصمہ اسماعیل بٹ نے بھی حلف لیا۔
تقریب میں ہدایت کار سید نور، مسعود بٹ اور شہزاد رفیق شریک ہوئے۔ اداکار شان شاہد، نشو بیگم، ریشم اور مدیحہ شاہ بھی موجود تھیں۔مصنف خلیل الرحمٰن قمر، سینئر اداکار عرفان کھوسٹ اور اداکار توقیر ناصر نے بھی شرکت کی۔ فیشن ڈیزائنر محمود بھٹی اور فلم ساز صفدر ملک بھی تقریب میں شریک ہوئے۔
اس موقع پر صدر لاہور پریس کلب ارشد انصاری سمیت دیگر صحافتی، ثقافتی اور سماجی شخصیات بھی موجود تھیں۔
تقریب سے خطاب کرتے ہوئے مریم اورنگزیب نے کہا کہ پنجاب حکومت فلم انڈسٹری کی بحالی کے لیے کوشاں ہے۔ حکومت اس شعبے میں سنجیدہ اقدامات کر رہی ہے۔انہوں نے کہا کہ حکومت فلم انڈسٹری کی رونقیں بحال کرنا چاہتی ہے۔ فلم سٹی میں جدید تقاضوں کے مطابق کام کیا جائے گا۔
پاکستان فلم پروڈیوسرز ایسوسی ایشن کے چیئرمین میاں امجد فرزند نے کہا کہ فلم انڈسٹری درست سمت میں آگے بڑھ رہی ہے۔انہوں نے عزم ظاہر کیا کہ وہ صنعت کے مسائل حل کرنے کی کوشش کریں گے۔ ان کا کہنا تھا کہ وہ منتخب کرنے والوں کی توقعات پر پورا اترنے کی کوشش کریں گے۔
