لاہور: قومی کرکٹ ٹیم کے سابق کپتان شاہد خان آفریدی نے کہا ہے کہ دورہ نیوزی لینڈ کے لیے محمد رضوان کو ہی ٹی 20 کا کپتان برقرار رکھنا چاہیے تھا۔ محسن نقوی مثبت آدمی ہیں لیکن ان کے پاس کرکٹ کا کوئی تجربہ نہیں۔
قومی کرکٹ ٹیم کے سابق کپتان شاہد خان آفریدی نے تقریب سے خطاب کرتے ہوئے کہا کہ میرٹ پر فیصلے نہ ہوں تو مسائل پیدا ہوتے ہیں۔ پاکستان کرکٹ بورڈ (پی سی بی) کا ہر چیئرمین سمجھتا ہے کہ میں سب کچھ ٹھیک کر دوں گا۔ لیکن چہرے کے ساتھ معلوم نہیں سسٹم کیوں نہیں بدلتا۔
انہوں نے کہا کہ کھلاڑیوں کی قومی ٹیم میں واپسی کا کوئی طریقہ کار نہیں ہے۔ کیونکہ جنہیں ٹی 20 سے نکالا گیا وہ مستقبل میں دوبارہ ٹی 20 کرکٹ میں ہوں گے۔
شاہد آفریدی نے کہا کہ لگتا ہے ابھی تک کرکٹ آئی سی یو میں ہے۔ کیونکہ بڑے ایونٹ کی تیاری اور پھر سرجری کی بات کرتے ہیں۔
انہوں نے کہا کہ کوچز شکست کی ذمہ داری نہیں لیتے اور خود کو بچانے کے لیے کھلاڑیوں پر الزامات لگا دیتے ہیں لیکن جیتنے پر کریڈٹ وہی کوچز لے جاتے ہیں۔
سابق کپتان نے کہا کہ نیوزی لینڈ کے خلاف سیریز میں سلمان غا ون ڈے کا کپتان ٹھیک ہے۔ لیکن ٹی 20 کے لیے سلمان آغا کا بطور کپتان انتخاب درست نہیں۔ محمد رضوان کو ٹی 20 کا کپتان برقرار رکھنا چاہیے تھا۔
انہوں نے کہا کہ چیئرمین پی سی بی محسن نقوی کام تو کرنا چاہتے ہیں اور وہ مثبت آدمی ہیں لیکن ان کے پاس کرکٹ کا کوئی تجربہ نہیں ہے۔ محسن نقوی کے پاس ایک وقت میں تین عہدے موجود ہیں۔ انہیں چاہیے کہ وہ کسی ایک عہدے کا انتخاب کر لیں۔
