اسلام آباد : بھارت کے خلاف پاکستان کی فتح پر آج یوم تشکر منایا جا رہا ہے ۔ملک بھر کی مساجد میں نماز شکرانہ کا اہتمام شہر شہر ریلیاں نکالی گئیں۔
بھارت کی جانب سے 7 مئی کی شب بلا اشتعال جنگ مسلط کرنے کے بعد پاک فوج کے منہ توڑ جواب اور جنگ بندی معاہدے سے پاکستان کی امن کی سوچ کی فتح پر آج ملک بھر میں یوم تشکر جوش و خروش سے منایا جا رہا ہے۔
آج ملک بھر کی مساجد میں اجتماعی دعاؤں اور شکرانے کے نوافل کا اہتمام کیا گیا۔ جس میں بھارت کے خلاف سرخرو ہونے پر رب تعالیٰ کا شکر ادا کرنے کے ساتھ اجتماعی دعاؤں میں پاکستان کی نظریاتی اور جغرافیائی سرحدوں کی حفاظت، ملک میں امن واستحکام، پاک فوج کی کامیابی وکامرانی اور قومی اتحاد برقرار رہنے کی خصوصی دعائیں کی گئیں۔ اس کے علاوہ اقلیتی برادری کی جانب سے ملک بھر میں دعائیہ تقریبات کا اہتمام کیا گیا۔
دریں اثنا کراچی، لاہور، اسلام آباد، راولپنڈی، پشاور، کوئٹہ، پنڈی بھٹیاں، نارروال، جڑانوالہ، میرپور آزاد کشمیر سمیت ملک کے طول وعرض میں پاک فوج کے بھارت کو منہ توڑ جوانے پر خوشیاں منائی جا رہی ہیں۔ مٹھائیاں تقسیم اور بھنگڑے بھی ڈالےگئے ہیں جب کہ سڑکوں سے گزرنے والی پاک فوج کے جوانوں کو پھولوں کے گلدستے اور گلے لگا کر ان سے عقیدت اور محبت کا اظہار کیا جا رہا ہے۔
یوم تشکر کے موقع پر مختلف سیاسی، سماجی، مذہبی، تجارتی انجمنوں کی جانب سے تقریبات، پاک فوج سے اظہار یکجہتی کے لیے شہر شہر ریلیاں نکالی جا رہی ہیں۔
ان اجتماعات اور ریلیوں سے حکومتی وزرا اور سیاسی وسماجی رہنماؤں نے خطاب کرتے ہوئے بھارت کے خلاف پاک فوج کی جرات کو سلام پیش کرتے ہوئے کہا کہ پاک فوج کے دندان شکن جواب سے بھارت کے جنگی جنون میں مبتلا سیاسی رہنما گھروں میں دپک کر بیٹھ گئے۔ پاک فوج نے جس پیشہ ورانہ مہارت کا مظاہرہ کرتے ہوئے اپنے سے چھ گنا بڑے دشمن کو گھٹنے ٹیکنے پر مجبور کیا اب اس کی پاکستان کی طرف میلی آنکھ سے دیکھنے کی جرات نہیں ہوگی۔ اگر کبھی ایسی بے وقوفی کی تو آج سے زیادہ طاقت کے ساتھ بھیانک انجام سے دوچار کریں گے۔
