لاہور : مقبول اداکارہ مہوش حیات کا کہنا ہے کہ شادی ایک جُوا ہے، اسی لیے وہ جلد بازی میں یہ فیصلہ نہیں کرنا چاہتیں۔اللہ تعالیٰ کے ساتھ ایک خاص تعلق ہے۔
مہوش حیات نے حال ہی میں ’فوچیا میگزین‘ کو دیے گئے انٹرویو میں اپنے کیریئر سمیت دیگر معاملات پر کھل کر گفتگو کی۔
اداکارہ نے بتایا کہ وہ مستقبل میں ہدایتکاری کا ارادہ رکھتی ہیں، وہ ڈراموں کے سیٹ پر ہدایتکاروں کے کام کو غور سے دیکھتی ہیں اور چھوٹی سے چھوٹی بات نوٹ کرتی ہیں تاکہ وہ باتیں مستقبل میں ان کے کام آ سکیں۔
انہوں نے یہ بھی کہا کہ اللہ کے ساتھ ان کا ایک خاص تعلق ہے، وہ تنہائی میں اللہ سے باتیں کرتی ہیں اور انہیں اس سے دلی سکون ملتا ہے۔
ایک سوال کے جواب میں مہوش حیات کا کہنا تھا کہ پاکستان میں مردوں کو تو یہ اجازت ہے کہ وہ باوقار طریقے سے عمر رسیدہ ہوں، کئی مرد بڑی عمر کے باوجود کم عمر لڑکیوں کے ساتھ اسکرین پر نظر آتے ہیں اور اس پر معاشرے کو کوئی اعتراض نہیں ہوتا، لیکن اداکاراؤں کے لیے یہ معیار مختلف ہے، ان سے توقع کی جاتی ہے کہ وقت ان کے لیے رک جائے۔
ان کے مطابق مغرب میں ایسا نہیں ہوتا، عمر پر ضرورت سے زیادہ زور ہمارے معاشرے میں دیا جاتا ہے، معلوم نہیں کہ ایک اداکارہ کی عمر کے بارے میں ہم اتنی فکر کیوں کرتے ہیں، حتیٰ کہ اس کی مہارت، محنت اور صلاحیت کو نظر انداز کرکے صرف عمر کو موضوعِ بحث بنایا جاتا ہے۔
مہوش حیات نے کہا کہ عمر بڑھنا ایک قدرتی عمل ہے جو کسی کے اختیار میں نہیں، ہر انسان ہر گزرتے دن کے ساتھ بڑا ہوتا جا رہا ہے، جو لوگ اداکاراؤں کی عمر پر تنقید کرتے ہیں، وہ خود بھی اسی عمل سے گزریں گے چنانچہ اس حوالے سے خواتین اداکاراؤں سے غیرمنصفانہ توقعات رکھنا درست نہیں۔
ان کا کہنا تھا کہ پاکستان میں ایسا زیادہ ہوتا ہے، جب کہ بالی وڈ میں ایسی سوچ کم ہے، وہاں تو اداکاراؤں کو سراہا جاتا ہے کہ انہوں نے بڑھتی عمر کے باوجود خود کو کس طرح جاذبِ نظر رکھا، مگر ہمارے یہاں صورت حال اس کے برعکس ہے۔
اداکارہ کے مطابق وہ زیادہ نہیں، مگر کچھ حد تک رومانوی ضرور ہیں، وہ حقیقت پسند ہیں اور ایک ایسے شخص سے شادی کرنا چاہتی ہیں جو ان کی زندگی میں سکون لائے اور جس پر انہیں مکمل اعتماد ہو۔
مہوش حیات نے دوٹوک الفاظ میں کہا کہ شادی ایک جُوا ہے اور وہ اس معاملے میں کبھی جلد بازی نہیں کریں گی۔
ان کے بقول اگرچہ کچھ لوگوں کے لیے شادی اولین ترجیح ہو سکتی ہے، مگر وہ چاہتی ہیں کہ ایک سمجھدار فیصلے کے تحت ایسے شخص سے شادی کریں جو نہ صرف انہیں سمجھے بلکہ ان کا ساتھ بھی دے۔
