کولمبو : پاکستان کی بہادر فائٹر بشریٰ اختر نے سری لنکا میں ہونے والے کے ایف ایل (KFL) کک باکسنگ ایونٹ میں شاندار کارکردگی دکھاتے ہوئے تاریخ رقم کر دی۔ بشریٰ اختر نے سری لنکا کی تجربہ کار فائٹر نمشا کماری کی مسلسل کامیابیوں کا سلسلہ ختم کرتے ہوئے ٹائٹل اپنے نام کیا۔
سری لنکا کے دارالحکومت کولمبو میں ہونے والے اس ایونٹ میں بشریٰ اختر نے شاندار تکنیک اور عزم و ہمت کے ساتھ فائٹ جیت کر عالمی سطح پر پاکستان کا نام روشن کیا۔
ان کی جیت نے نہ صرف پاکستانی شائقینِ کھیل کو مسرور کیا بلکہ خواتین ایتھلیٹس کے لیے بھی ایک نیا حوصلہ اور مثال قائم کی۔
فتح کے بعد گفتگو کرتے ہوئے بشریٰ اختر نے کہا "یہ فائٹ میرے لیے بہت چیلنجنگ تھی، لیکن میں نے اپنی پوری توجہ اور محنت سے مقابلہ جیتا۔ میں اپنے کوچز، فیڈریشن، مداحوں اور اپنے خاندان کا بے حد شکر گزار ہوں جن کی دعاؤں نے مجھے یہاں تک پہنچایا۔”
انہوں نے کک باکسنگ فیڈریشن آف پاکستان کا شکریہ ادا کرتے ہوئے کہا کہ فیڈریشن نے ان پر جس اعتماد کا اظہار کیا، وہ اس پر پوری اتری ہیں۔
بشریٰ اختر کی یہ کامیابی پاکستان میں خواتین کھلاڑیوں کے لیے ایک نیا سنگ میل ثابت ہو رہی ہے۔ ان کی جیت نے یہ ثابت کیا ہے کہ پاکستانی خواتین عالمی سطح کے ایونٹس میں کسی سے کم نہیں۔
کک باکسنگ کے بین الاقوامی حلقوں نے بشریٰ اختر کی اس جیت کو پاکستانی مارشل آرٹس کے لیے ایک بڑی کامیابی قرار دیا ہے۔
کھیلوں کے تجزیہ کاروں کے مطابق، بشریٰ اختر کی یہ جیت مستقبل میں پاکستان میں کک باکسنگ اور دیگر فائٹنگ اسپورٹس کے فروغ کا سبب بن سکتی ہے۔
About The Author
