نئی دہلی / بیجنگ – بھارت اور چین کے درمیان پانچ سال بعد براہِ راست فضائی سروس بحال کر دی گئی۔ کولکتہ سے روانہ ہونے والی انڈیگو ایئرلائنز کی پرواز 6E-1703 تقریباً 180 مسافروں کو لے کر جنوبی چین کے شہر گوانگزو پہنچی۔
یہ پروازیں 2020 کے آغاز میں کووِڈ-19 وبا کے دوران معطل کی گئی تھیں، جس کے بعد ہمالیہ کے متنازع سرحدی علاقے میں دونوں ممالک کی افواج کے درمیان جھڑپوں کے نتیجے میں سفارتی کشیدگی بڑھنے سے فضائی رابطے دوبارہ بحال نہیں ہو سکے تھے۔
تاہم اب دونوں ممالک کے تعلقات میں بتدریج بہتری دیکھنے میں آ رہی ہے۔ گزشتہ سال بھارت اور چین نے سرحدی گشت سے متعلق ایک تاریخی معاہدے پر دستخط کیے، جس کے بعد سفارتی روابط میں نرمی کے آثار نمایاں ہوئے۔
رواں سال اگست 2025 میں بھارتی وزیراعظم نریندر مودی نے سات سال بعد چین کا دورہ کیا، جبکہ اسی ماہ چینی وزیرِ خارجہ وانگ یی نے بھی بھارت کا دورہ کیا تھا۔ دونوں دوروں کو تعلقات کی بحالی کی سمت ایک اہم پیشرفت قرار دیا جا رہا ہے۔
بھارتی وزارتِ ہوا بازی کے مطابق پروازوں کی بحالی سے دونوں ممالک کے درمیان عوامی روابط، سیاحت اور تجارتی تبادلوں میں اضافہ ہوگا۔ ماہرین کے مطابق یہ پیشرفت ایشیا میں اقتصادی تعاون کے فروغ کے لیے بھی مثبت اشارہ ہے۔
About The Author
