ڈھاکا: پاکستان ہاکی ٹیم نے ورلڈ کپ کوالیفائنگ مرحلے میں پیشقدمی کی راہ ہموار کرتے ہوئے بنگلادیش کے خلاف تین میچوں کی سیریز کا آخری میچ بھی واضح برتری سے جیت لیا۔ ڈھاکا میں کھیلا گیا تیسرا میچ 3-10 کے بڑے مارجن سے پاکستان کے نام رہا، جس کے ساتھ مہمان ٹیم نے سیریز 0-3 سے اپنے نام کرتے ہوئے شاندار کلین سویپ مکمل کیا۔
میچ کا آغاز ہی پاکستان کے دبنگ کھیل سے ہوا جہاں پینالٹی کارنر اسپیشلسٹ محمد سفیان خان نے مسلسل حملے کرتے ہوئے ڈبل ہیٹرک مکمل کی اور پورے میچ میں 6 گول اسکور کرکے بنگلادیشی دفاع کو بےبس کر دیا۔ عبدالرحمٰن نے بھی زبردست کھیل پیش کرتے ہوئے 2 گول کیے جبکہ ندیم احمد اور رانا ولید نے ایک، ایک بار گیند کو جال میں پہنچایا۔
بنگلادیش کی جانب سے عبداللہ، رقیب الحسن اور اشرف الحسن نے گول اسکور کیے، تاہم میزبان ٹیم پاکستان کے برق رفتار اور جاندار کھیل کے سامنے مقابلہ برقرار رکھنے میں ناکام رہی۔
میچ کے اختتام پر محمد سفیان خان کو شان دار کارکردگی پر مین آف دی میچ قرار دیا گیا، جبکہ شائقین نے بھی پاکستان کی بہترین ٹیم ورک اور اٹیکنگ کھیل کی خوب تعریف کی۔
پاکستانی کھلاڑیوں کی یہ شاندار فتوحات نہ صرف سیریز کامیابی کا اظہار ہیں بلکہ ورلڈ کپ کوالیفائرز کے لیے ٹیم کے بلند حوصلوں کی عکاسی بھی کرتی ہیں، جس سے مستقبل میں بہتر نتائج کی امید پیدا ہو گئی ہے۔
