امریکی صدر ڈونلڈ ٹرمپ نے کہا ہے کہ غزہ کے انتظام کی نگرانی کے لیے تشکیل دیے گئے ’’بورڈ آف پیس‘‘ میں اگلے دو برس کے لیے دنیا کے کئی بڑے ممالک کے سربراہان شامل ہوں گے۔ انہوں نے یہ بات وائٹ ہاؤس میں سعودی ولی عہد محمد بن سلمان کے اعزاز میں دیے گئے عشائیے سے خطاب کرتے ہوئے کہی۔
ٹرمپ نے کہا کہ ’’مجھے امید ہے کہ آپ کی عظمت بھی اس بورڈ کا حصہ ہوں گے۔‘‘ انہوں نے بتایا کہ متعدد ممالک اس بااختیار انتظامی بورڈ میں شمولیت کے خواہشمند ہیں، جو ان کے مطابق ’’بہت بڑا بورڈ‘‘ بنے گا کیونکہ اس میں مختلف بڑی طاقتوں کے سربراہ شامل ہوں گے۔ یہ بیان ایسے وقت میں سامنے آیا ہے جب اقوام متحدہ کی سلامتی کونسل نے حال ہی میں ایک قرارداد منظور کی ہے جس کے تحت امریکی قیادت میں بنایا گیا بورڈ آف پیس 2027 کے اختتام تک غزہ کے انتظام کا وسیع مینڈیٹ رکھے گا۔
ٹرمپ نے بغیر تفصیل بتائے، گزشتہ ماہ غزہ میں جنگ بندی کے حصول میں کردار ادا کرنے پر محمد بن سلمان کا شکریہ بھی ادا کیا۔ ان کا کہنا تھا کہ ’’اگرچہ صورتحال کچھ پیچیدہ دکھائی دیتی ہے، لیکن غزہ مکمل ہونے کے بہت قریب ہے۔‘‘
انہوں نے جنگ کے خاتمے کو یرغمالیوں کی واپسی سے مشروط قرار دیا، تاہم اپنے بیان میں یہ غلط دعویٰ کیا کہ حماس کے پاس واپسی کے لیے صرف دو لاشیں باقی ہیں، جبکہ اصل تعداد تین ہے۔
ٹرمپ کا مزید کہنا تھا کہ ’’حماس نے بہت سا کام کیا ہے، اور بہت سے لوگوں کو یقین نہیں تھا کہ وہ ایسا کریں گے۔‘‘ انہوں نے غزہ کے رہنے والوں کے حوالے سے بھی دعویٰ کیا کہ ’’وہ اپنے گھروں کو واپس جانا شروع کر چکے ہیں اور پہلے سے زیادہ محفوظ ہیں۔‘‘
تاہم زمینی حقائق کے مطابق غزہ کا بڑا حصہ شدید تباہی کا شکار ہے اور قریباً 20 لاکھ کی آبادی کا بڑا حصہ اب بھی خیموں میں رہنے پر مجبور ہے۔
