برسلز – یورپی یونین کے رکن ممالک نے یوکرین کو 2026 اور 2027 کے دوران مجموعی طور پر 90 ارب یورو (تقریباً 105.5 ارب امریکی ڈالر) کی مالی امداد فراہم کرنے پر اتفاق کر لیا ہے۔
یورپی یونین کونسل کے صدر انتونیو کوسٹا نے جمعہ کے اوائل میں سوشل میڈیا پلیٹ فارم ایکس پر جاری بیان میں اس فیصلے کی تصدیق کی۔ انہوں نے کہا،
“ہمارے پاس ایک معاہدہ ہے۔ 2026 اور 2027 کے لیے یوکرین کو 90 ارب یورو کی امداد فراہم کرنے کے فیصلے کو منظوری دے دی گئی ہے۔ ہم نے عزم کیا، اور ہم نے اسے عملی جامہ پہنایا۔”
یورپی یونین کے حکام کے مطابق یہ امدادی پیکج یوکرین کی معیشت کو سہارا دینے، بنیادی ڈھانچے کی بحالی اور جنگ سے متاثرہ شعبوں کی مدد کے لیے فراہم کیا جائے گا، جبکہ اس کا مقصد یوکرین کی طویل المدتی استحکام اور دفاعی صلاحیتوں کو مضبوط بنانا بھی ہے۔
یہ فیصلہ ایسے وقت میں سامنے آیا ہے جب یوکرین کو روس کے ساتھ جاری جنگ کے باعث شدید مالی اور انسانی چیلنجز کا سامنا ہے، اور یورپی یونین مسلسل کیف حکومت کی سیاسی، اقتصادی اور سفارتی حمایت کا اعادہ کر رہی ہے۔
About The Author
