اسلام آباد — متحدہ عرب امارات میں مقیم معروف کاروباری شخصیت اور دنگل ورلڈ کپ کے سرپرست و رہنما ڈائریکٹر ملک منیر اعوان نے اعلان کیا ہے کہ دنگل ورلڈ کپ کے پاکستان سیزن کا باضابطہ آغاز 23 مارچ 2026 کو پاکستان میں کیا جائے گا، جس کے بعد اس ایونٹ کا اگلا بین الاقوامی سیزن دبئی میں منعقد ہوگا۔
یہ اعلان یکم فروری کو اسلام آباد میں دنگل ورلڈ کپ کی آرگنائزر ٹیم کی جانب سے منعقدہ پریس کانفرنس کے دوران کیا گیا، جس میں ایونٹ کی تیاریوں، شریک ممالک اور عالمی ٹیموں کی شرکت سے متعلق تفصیلات بھی میڈیا کے ساتھ شیئر کی گئیں۔
عالمی ہم آہنگی اور نوجوان ٹیلنٹ کا فروغ
منتظمین کے مطابق دنگل ورلڈ کپ ایک میگا اسپورٹس ایونٹ ہے، جس کا مقصد کھیل کے ذریعے عالمی ہم آہنگی کو فروغ دینا، نوجوان کھلاڑیوں کو مواقع فراہم کرنا اور مختلف ممالک کے درمیان ثقافتی روابط کو مضبوط بنانا ہے۔
دنیا بھر سے پہلوان اور اسپورٹس نمائندگان اس عالمی مقابلے میں شرکت کریں گے، جبکہ آئندہ سیزن کو دبئی منتقل کرنے کا فیصلہ اس ایونٹ کو بین الاقوامی سطح پر مزید وسعت دینے کی عکاسی کرتا ہے۔
انتظامی قیادت اور آئندہ منصوبہ بندی
دنگل ورلڈ کپ کے سی ای او عمران شاہ اور ملک منیر اعوان اس عالمی ایونٹ کی سرپرستی اور انتظامی قیادت میں مرکزی کردار ادا کر رہے ہیں۔
منتظمین نے بتایا کہ رمضان المبارک کے دوران دبئی میں عالمی ٹیموں کے نمائندگان کے اعزاز میں ایک خصوصی تقریب کا بھی اہتمام کیا جائے گا، جس میں دبئی سیزن کے انتظامات اور مستقبل کے منصوبوں سے متعلق مزید تفصیلات سامنے لائی جائیں گی۔
About The Author
