ضلع خیبر کے سرحدی علاقے بازار زخہ خیل میں واقع مارو سر اور شاہ کوٹ سر کے مقامات پر آج شام پاک افغان سرحد پر ایک بار پھر فائرنگ کا تبادلہ ہوا۔ سیکیورٹی ذرائع کے مطابق افغان طالبان کی جانب سے فائرنگ کا آغاز شام 5 بج کر 15 منٹ پر کیا گیا جس کے بعد افواجِ پاکستان نے فوری اور مؤثر جواب دیا۔
ذرائع کا کہنا ہے کہ جوابی کارروائی کے نتیجے میں افغان فورسز کو بھاری نقصان پہنچنے کی اطلاعات ہیں جبکہ بعض افغان سرحدی پوسٹوں پر آگ لگنے کے مناظر دور سے دیکھے گئے۔ تاہم اس حوالے سے سرکاری سطح پر نقصانات کی باضابطہ تصدیق سامنے نہیں آئی۔
فائرنگ کچھ دیر جاری رہنے کے بعد رک گئی اور علاقے میں صورتحال کو کنٹرول میں بتایا جا رہا ہے۔ سیکیورٹی حکام کے مطابق سرحدی مقامات پر نگرانی سخت کر دی گئی ہے اور فورسز مکمل طور پر الرٹ ہیں تاکہ کسی بھی ممکنہ دراندازی یا جارحیت کا فوری جواب دیا جا سکے۔
حکام کا کہنا ہے کہ پاکستان اپنی سرحدی سالمیت اور شہری آبادی کے تحفظ پر کسی قسم کا سمجھوتہ نہیں کرے گا جبکہ سرحدی علاقوں میں سیکیورٹی انتظامات مزید مؤثر بنائے جا رہے ہیں۔
About The Author
