پاکستان کے متنازع یوٹیوبر رجب بٹ ایک بار پھر سوشل میڈیا پر شدید تنقید کی زد میں آ گئے ہیں، اس بار ایک وائرل ویڈیو نے معاملے کو مزید سنگین بنا دیا ہے۔
سوشل میڈیا پر گردش کرنے والی ویڈیو میں رجب بٹ کو ایک ریسٹورنٹ میں وی لاگ بناتے دیکھا جا سکتا ہے، تاہم ویڈیو کے پس منظر میں موجود ایک فیملی واضح طور پر غیر آرام دہ محسوس کرتی نظر آئی۔ ایک خاتون کو کیمرے سے بچنے کے لیے چہرہ چھپاتے اور رخ موڑتے دیکھا گیا، جس پر صارفین نے اسے پرائیویسی کی خلاف ورزی قرار دیا۔
اس معاملے پر حنا پرویز بٹ نے سوشل میڈیا پلیٹ فارم ایکس پر شدید ردعمل دیتے ہوئے اس رویے کو “شرمناک” قرار دیا۔ ان کا کہنا تھا کہ کچھ افراد بغیر سوچے سمجھے عوامی مقامات پر کیمرہ استعمال کرتے ہیں، جس سے دیگر افراد اور خاندانوں کی نجی زندگی متاثر ہوتی ہے۔
انہوں نے مزید کہا کہ افسوسناک امر یہ ہے کہ ایسے طرزِ عمل کے باوجود بعض لوگ ان شخصیات کو اپنا ہیرو سمجھتے ہیں۔
یہ تنازع ایسے وقت میں سامنے آیا ہے جب رجب بٹ پہلے ہی اپنی نجی زندگی اور دیگر معاملات کے باعث خبروں میں رہے ہیں، جن میں ان کی شادی اور بعد ازاں طلاق بھی شامل ہے۔
About The Author
