دیامر بھاشا ڈیم منصوبے کے تحت واپڈا نے متاثرین کو مزید 67کروڑ 77لاکھ روپے معاوضہ ادا کردیا، منصوبے کی زمین کے حصول، آبادیوں کی منتقلی اور ادائیگیوں کا عمل تیزی سے جاری ہے۔
ترجمان واپڈا کے مطابق بوشی داس میں منعقدہ تقریب کے دوران تھور اور ہربن کے متاثرین میں جرگہ کے ذریعے طے پانے والے معاہدے کے تحت چیک تقسیم کیے گئے۔تقریب میں جنرل منیجر دیامر بھاشا ڈیم، جرگہ اراکین اور ضلعی حکام نے شرکت کی۔
ترجمان کے مطابق تھور ہربن امن جرگہ نے دونوں قبائل کے درمیان دیرینہ سرحدی تنازع کامیابی سے حل کیا جس کے بعد زمین کے عوض ادائیگیوں کا عمل مزید تیز کیا گیا۔واپڈا اب تک متاثرین کو مجموعی طور پر 64ارب روپے سے زائد ادا کر چکا ہے جبکہ دیامر اور اپر کوہستان کی ضلعی انتظامیہ کو بھی اربوں روپے منتقل کیے جا چکے ہیں۔
منصوبے کیلئے درکار پینتیس ہزار نو سو چوبیس ایکڑ میں سے تینتیس ہزار آٹھ سو اڑتالیس ایکڑ زمین حاصل کر لی گئی ہے۔ترجمان کے مطابق دیامر بھاشا ڈیم میں اکیاسی لاکھ ایکڑ فٹ پانی ذخیرہ کرنے کی صلاحیت ہوگی جس سے بارہ لاکھ ایکڑ اضافی اراضی سیراب ہوگی
About The Author
