ایک غیر معمولی اور دلچسپ واقعے میں 8 سالہ پاکستانی نژاد بچے نے امریکی خلائی تحقیقاتی ادارے NASA کی سرکاری ویب سائٹ پر موجود ایک ہجے کی معمولی غلطی کی نشاندہی کر کے سب کو حیران کر دیا۔
تفصیلات کے مطابق ناسا کی ایک آن لائن پوسٹ میں “Explore Jupiter” کی جگہ غلطی سے “Expor Jupiter” لکھا گیا تھا، جس میں لفظ Explore کا ایک حرف “l” غائب تھا۔ یہ معمولی غلطی بچے نے نہایت باریک بینی سے نوٹ کی اور اپنے والد کے ذریعے اس کی نشاندہی کی۔
بچے کے والد Masrat Ali نے سوشل میڈیا پلیٹ فارم X (Twitter) پر خوشگوار انداز میں ناسا کو اس غلطی سے آگاہ کیا اور اسے “اہم مشن اپڈیٹ” قرار دیا۔
والد کے مطابق ان کے 8 سالہ بیٹے نے نہ صرف یہ غلطی دیکھی بلکہ زور دیا کہ اسے ضرور رپورٹ کیا جائے۔ بچے کی دلچسپی خلا، راکٹس اور خلائی مشنز میں ہے اور وہ مستقبل میں خلا باز بننے کا خواب رکھتا ہے۔
ناسا نے بھی اس نشاندہی پر مثبت اور دوستانہ ردعمل دیتے ہوئے غلطی کو تسلیم کیا اور فوراً اسے درست کرنے کا اعلان کیا۔ ادارے کے اس رویے کو سوشل میڈیا صارفین نے بھی خوب سراہا۔
یہ دلچسپ واقعہ سوشل میڈیا پر تیزی سے وائرل ہو گیا ہے اور صارفین بچے کی ذہانت اور توجہ کو سراہتے ہوئے اس کے روشن مستقبل کے لیے نیک خواہشات کا اظہار کر رہے ہیں۔
ایک صارف نے لکھا کہ یہ بچہ مستقبل کا سائنسدان یا خلا باز ہو سکتا ہے، جبکہ ایک اور نے کہا کہ “آج اس نے ایک چھوٹی غلطی درست کی ہے، کل شاید بڑے خلائی مشنز کا حصہ ہوگا۔”
About The Author
