اداکار فیصل قریشی کو لائف ٹائم اچیومنٹ ایوارڈ سے نواز دیا گیا -

پاکستان کے نامور فلم و ٹیلی ویژن اداکار فیصل قریشی کو ان کی شاندار فنی خدمات کے اعتراف میں لائف ٹائم اچیومنٹ ایوارڈ سے نواز دیا گیا۔ ان کے اعزاز میں کراچی میں ایک پروقار ٹریبیوٹ تقریب منعقد کی گئی جس میں شوبز انڈسٹری کی معروف شخصیات نے بھرپور شرکت کی۔

یہ تقریب آرٹس کونسل آف پاکستان کراچی اور لائف اسٹائل جرنلسٹس ایسوسی ایشن کے اشتراک سے آڈیٹوریم ون میں منعقد ہوئی، جہاں فیصل قریشی کے فنی سفر، کامیابیوں اور ڈرامہ و فلم انڈسٹری میں ان کی خدمات کو خراجِ تحسین پیش کیا گیا۔

تقریب میں شوبز انڈسٹری کے کئی سینئر اور معروف فنکار شریک ہوئے جن میں مصطفیٰ قریشی، عدنان صدیقی، بہروز سبزواری، ہمایوں سعید، صلاح الدین تنیو، شہزاد نواز، فاخر محمود اور دیگر نمایاں شخصیات شامل تھیں۔

اس موقع پر ایک رنگا رنگ میوزیکل پروگرام بھی پیش کیا گیا جس میں میرب جیوین، نرمیلا میگھانی، افشاں خان، شازیہ کوثر اور شبانہ کوثر نے اپنی آواز کا جادو جگایا اور حاضرین سے خوب داد وصول کی۔