اتھلیٹکس فیڈریشن آف پاکستان کے زیر اہتمام اور خیبر پختونخوا اتھلیٹکس ایسوسی ایشن و ڈائریکٹوریٹ جنرل آف سپورٹس خیبر پختونخوا کے تعاون سے جاری نیشنل جونیئر اتھلیٹکس چیمپئن شپ کے دوسرے روز اہم فائنل مقابلے پشاور کے قیوم اسٹیڈیم میں منعقد ہوں گے۔
چیمپئن شپ کے دوسرے روز مردوں اور خواتین کے مختلف انفرادی اور ٹیم ایونٹس کے فائنل مقابلے شیڈول کیے گئے ہیں، جن میں ملک بھر سے تعلق رکھنے والے نوجوان اتھلیٹس اپنی صلاحیتوں کا مظاہرہ کریں گے۔ مقابلوں میں جیولین تھرو، لانگ جمپ، ہیمر تھرو، مکسڈ ریلے اور مختلف ٹریک ایونٹس شامل ہیں۔
اتھلیٹکس فیڈریشن آف پاکستان کے صدر بریگیڈیئر ریٹائرڈ وجاہت حسین کے مطابق مردوں کے فائنل ایونٹس میں 400 میٹر ریس، 3000 میٹر ریس، جیولین تھرو اور ہیمر تھرو کے مقابلے شامل ہوں گے۔ دوسری جانب خواتین کے فائنل مقابلوں میں 400 میٹر ریس، 1500 میٹر ریس، جیولین تھرو، لانگ جمپ اور ہیمر تھرو کے ایونٹس منعقد کیے جائیں گے۔
اس کے علاوہ مکسڈ 4×100 میٹر ریلے کے دلچسپ مقابلے بھی چیمپئن شپ کا حصہ ہوں گے، جن میں مرد اور خواتین کھلاڑی مشترکہ طور پر حصہ لیں گے۔ منتظمین کے مطابق تمام مقابلے روزانہ شام 7 بجے شروع ہوں گے۔
چیمپئن شپ میں ملک بھر سے 14 مرد و خواتین ٹیمیں شریک ہیں، جن میں پاکستان آرمی، پاکستان ائیر فورس، پاکستان نیوی، پاکستان واپڈا، پاکستان ریلوے، پاکستان پولیس اور ہائر ایجوکیشن کمیشن سمیت پنجاب، سندھ، بلوچستان، خیبر پختونخوا، گلگت بلتستان، آزاد جموں و کشمیر اور اسلام آباد کی نمائندہ ٹیمیں شامل ہیں۔
منتظمین کے مطابق چیمپئن شپ 10 جون تک جاری رہے گی، جبکہ اختتامی روز فائنل مقابلوں میں نمایاں کارکردگی دکھانے والے کھلاڑیوں میں انعامات اور اعزازات بھی تقسیم کیے جائیں گے۔ اس ایونٹ کا مقصد ملک میں نوجوان ٹیلنٹ کو فروغ دینا اور مستقبل کے قومی و بین الاقوامی مقابلوں کے لیے باصلاحیت اتھلیٹس کی تیاری ہے۔
About The Author
