جنوبی لبنان میں سیکیورٹی صورتحال مزید کشیدہ ہونے کے بعد اسرائیلی فوج نے 20 قصبوں اور دیہات کے رہائشیوں کو فوری طور پر اپنے گھروں سے نکلنے اور محفوظ علاقوں میں منتقل ہونے کی ہدایت جاری کر دی ہے۔
اسرائیلی فوج کی جانب سے جاری بیان میں متاثرہ علاقوں کے شہریوں سے کہا گیا ہے کہ وہ بلا تاخیر اپنے گھروں کو خالی کریں اور دریا زہرانی کے شمال میں واقع محفوظ علاقوں کا رخ کریں۔ فوجی حکام نے خبردار کیا ہے کہ جاری سیکیورٹی حالات کے پیش نظر انخلاء کی ہدایات پر فوری عملدرآمد ضروری ہے۔
تاحال اسرائیلی فوج نے اس غیر معمولی اقدام کی تفصیلی وجوہات بیان نہیں کیں، تاہم مبصرین کا کہنا ہے کہ جنوبی لبنان میں بڑھتی ہوئی فوجی سرگرمیوں اور سرحدی کشیدگی کے تناظر میں یہ فیصلہ کیا گیا ہے۔
انخلاء کے احکامات کے بعد متاثرہ علاقوں میں تشویش اور غیر یقینی صورتحال پیدا ہو گئی ہے۔ مقامی ذرائع کے مطابق متعدد خاندانوں نے محفوظ مقامات کی جانب نقل مکانی شروع کر دی ہے جبکہ بعض علاقوں میں ٹریفک کے دباؤ اور نقل و حرکت میں اضافہ بھی دیکھا جا رہا ہے۔
About The Author
