پی ٹی بی ایف کا آئی بی ایف ورلڈ کپ کے لیے قومی اسکواڈ کا اعلان، پی ایس بی سے فوری این او سی اور مالی معاونت کی اپیل -

اسلام آباد: پاکستان ٹین پن بولنگ فیڈریشن (PTBF) نے جرمنی کے شہر میونخ میں 12 سے 21 اکتوبر تک ہونے والی انٹرنیشنل بولنگ فیڈریشن (IBF) ورلڈ کپ ٹین پن بولنگ چیمپئن شپ کے لیے قومی اسکواڈ کا اعلان کر دیا۔
قومی وفد کی قیادت ٹیم مینیجر محمد حسین کریں گے، جبکہ چار رکنی قومی اسکواڈ میں احمر سلڈیرا، غضنفر بلال، دانیال الرحمٰن اور محمد معیز شامل ہیں۔
پی ٹی بی ایف کے صدر اعجاز الرحمٰن کے مطابق میگا ایونٹ میں دنیا بھر سے تقریباً 48 ممالک کے کھلاڑی شرکت کریں گے، جن میں پاکستان، امریکہ، جرمنی، ملائیشیا، سنگاپور، جنوبی کوریا، آسٹریلیا، کویت، چین، کینیڈا، اسپین، فرانس، سویڈن، نیدرلینڈز، پولینڈ، ترکی، قطر، سعودی عرب، متحدہ عرب امارات اور برطانیہ سمیت دیگر ممالک شامل ہیں۔
اعجاز الرحمٰن نے کہا کہ آئی بی ایف ورلڈ کپ پاکستانی کھلاڑیوں کے لیے دنیا کے بہترین بولرز کے خلاف اپنی صلاحیتیں آزمانے کا اہم عالمی پلیٹ فارم ہے۔ قومی اسکواڈ نے ایونٹ کے لیے بھرپور تیاری کی ہے اور امید ہے کہ کھلاڑی شاندار کارکردگی کا مظاہرہ کرتے ہوئے عالمی سطح پر پاکستان کا نام روشن کریں گے۔
انہوں نے وزارتِ بین الصوبائی رابطہ (IPC) اور پاکستان اسپورٹس بورڈ (PSB) سے قومی وفد کی بروقت روانگی کے لیے فوری اقدامات کی اپیل کرتے ہوئے کہا کہ پی ایس بی لازمی نو آبجیکشن سرٹیفکیٹ (NOC) ہنگامی بنیادوں پر جاری کرے تاکہ کھلاڑیوں کی ویزا درخواستیں، ٹکٹنگ اور دیگر سفری انتظامات بروقت مکمل کیے جا سکیں۔
پی ٹی بی ایف نے کھیلوں کے حکام سے مالی گرانٹ اور معاونت کی بھی درخواست کی ہے تاکہ قومی اسکواڈ کی ایونٹ رجسٹریشن فیس، سفری اخراجات، بولنگ کا سامان اور رہائش سمیت دیگر ضروری اخراجات پورے کیے جا سکیں۔
پی ٹی بی ایف صدر نے کہا کہ ملک میں کھیلوں کے ٹیلنٹ کو نکھارنے اور عالمی سطح پر پاکستان کی مسلسل نمائندگی یقینی بنانے کے لیے حکومت کی جانب سے بروقت ادارہ جاتی تعاون ناگزیر ہے۔