کولکتہ – ویسٹ انڈیز کے معروف آل راؤنڈر آندرے رسل نے آئی پی ایل 2026 کی نیلامی سے قبل بڑا اعلان کرتے ہوئے انڈین پریمیئر لیگ سے ریٹائرمنٹ لے لی۔ 37 سالہ رسل، جنہیں حال ہی میں کولکتہ نائٹ رائیڈرز (کے کے آر) نے ریلیز کیا تھا، نے بتایا کہ وہ اب کسی دوسری فرنچائز سے معاہدہ نہیں کریں گے بلکہ اگلے سیزن میں کے کے آر کے معاون عملے میں بطور ’پاور کوچ‘ شامل ہوں گے۔
انسٹاگرام پر جاری پیغام میں رسل نے کہا کہ آئی پی ایل میں ان کا سفر یادگار رہا۔ انہوں نے کہا کہ وہ اسی وقت ریٹائر ہونا چاہتے ہیں جب لوگ یہ سمجھیں کہ ان میں ابھی مزید کرکٹ باقی ہے، نہ کہ یہ سوال کریں کہ ریٹائرمنٹ کا فیصلہ پہلے کیوں نہیں کیا۔
آندرے رسل نے اپنے آئی پی ایل کیریئر میں 140 میچ کھیلے، 2651 رنز بنائے اور 174 کا سٹرائیک ریٹ برقرار رکھا، جس کی بدولت وہ لیگ کے خطرناک پاور ہٹرز میں شمار ہوتے ہیں۔ وہ 123 وکٹیں بھی حاصل کر چکے ہیں، جن میں 5/15 ان کی بہترین باولنگ کارکردگی رہی۔
انہوں نے 2012 میں دہلی ڈیئرڈیولز کی جانب سے ڈیبیو کیا، جبکہ 2014 سے 2025 تک کولکتہ نائٹ رائیڈرز کا حصہ رہے۔ رسل نے کے کے آر کے لیے 133 میچ کھیلے اور ٹیم کو دو آئی پی ایل ٹائٹلز (2014 اور 2024) جتوانے میں اہم کردار ادا کیا۔ انہیں دو مرتبہ (2015 اور 2019) آئی پی ایل ایم وی پی ایوارڈ بھی ملا، جبکہ 223 چھکوں کے ساتھ وہ لیگ میں سب سے زیادہ چھکے لگانے والے کھلاڑیوں میں ساتویں نمبر پر ہیں۔
رسل کے مطابق وہ کے کے آر کے سی ای او وینکی میسور اور شریک مالک شاہ رخ خان سے گفتگو کے بعد اس نتیجے پر پہنچے کہ فرنچائز کے سیٹ اپ میں رہ کر نئی اننگز شروع کرنا بہترین فیصلہ ہے۔ انہوں نے واضح کیا کہ اگرچہ وہ آئی پی ایل کو الوداع کہہ رہے ہیں، لیکن دیگر عالمی ٹی ٹونٹی لیگز میں ان کی شرکت جاری رہے گی۔
