وزیر اعظم شہباز شریف کا کہنا ہے دشمن یاد رکھے ہمیں پانی بند کرنے کی دھمکی نہ دو۔۔ تم پانی کی ایک بوند بھی پاکستان سے چھین نہیں سکتے۔۔ اگر تم نے یہ حرکت کی تو تمہیں ایک بار پھر وہ سبق سکھائیں گے کہ تم کانوں کو ہاتھ لگاؤ گے۔۔ پاکستان کا تم کبھی بھی بال بیکا نہیں کر سکتے۔
نوجوانوں کے عالمی دن کے موقع پر تقریب سے خطاب کرتے ہوئے وزیر اعظم شہباز شریف کا کہنا تھا پاکستان کی ترقی اور خوشحالی کی کنجی قوم کے زندہ ستاروں کے ہاتھ میں ہے۔ 14 اگست کی آمد آمد ہے، پوری قوم کو یوم آزادی کی مبارکباد دیتا ہوں۔
وزیراعظم نے کہا کہ قائداعظم محمد علی جناح ان چند لوگوں میں سے ہیں جنہوں نے تاریخ کا رخ موڑا،، دنیا کا نقشہ بدلا، ایک نئی قوم ایک نیا ملک تخلیق کیا۔۔ حضرت قائد اعظم کو اللہ تعالی نے یہ توفیق دی اور 14 اگست1947ء کو پاکستان معرض وجود میں آیا، تحریک پاکستان میں لاکھوں مسلمانوں نے حضرت قائد اعظم کی عظیم لیڈرشپ میں حصہ لیا جس میں نوجوان، انجینئرز، ڈاکٹرز، علماء کرام سمیت ہر طبقہ شامل تھا۔۔
شہباز شریف نے کہا ہمارے اقلیتی بھائیوں اور بہنوں نے بھی تحریک پاکستان میں بھرپور حصہ لیا اور ان کا نہ صرف قیام پاکستان میں بڑا کردار ہے بلکہ تعمیر پاکستان میں بھی ان کا نمایاں کردار ہے۔
وزیراعظم نے کہا کہ آج ایک نیا پاکستان معرض وجود میں آ چکا ہے۔ مئی میں پاک فضائیہ نے 4 رافیل جہازوں سمیت بھارت کے 6 جہاز مار گرائے۔۔ اس چار دن کی جنگ میں ہمارے دلیر جوانوں نے ان کو وہ سبق سکھایا جو ان کو رہتی دنیا تک یاد رہے گا۔۔
وزیراعظم نے اپنے خطاب میں کہا ہماری افواج پاکستان کےوہ سپوت اور جوان ہیں کہ جب وہ میدان جنگ میں نکلے تو ان کی ماؤں نے ان کے لیے دعا کی کہ بیٹا جا کے پاکستان کا جھنڈا بلند کرنا ہے۔۔پاکستان کی سرحدوں کی حفاظت کرنا اور جان دے دینا گھر واپس نہ آنا لیکن دشمن کو زیر کر کے آنا۔۔
انہوں نے کہا کہ آج دشمن پر یہ واضح کر دوں کہ اگر تم ہمارا پانی بند کرنے کی دھمکی دیتے ہو تو یہ بات ذہن میں رکھنا کہ پانی کی ایک بوند بھی تم پاکستان سے چھین نہیں سکتے، انہوں نے کہا کہ اب اس پاکستان کو نوجوانوں نے تعمیر کرنا ہے ،لیپ ٹاپ فار آل سکیم کے تحت بلاسود قسطوں پر لیپ ٹاپ فراہم کئے جائیں گے۔
اسلام آباد، گلگت بلتستان،آزاد کشمیر سمیت پاکستان کے دوسرے علاقوں میں ایک لاکھ لیپ ٹاپ باصلاحیت نوجوانوں کی تعلیمی قابلیت کے بنیاد پر تقسیم کئے جائیں گے، پاکستان کی تعمیرو ترقی کے لیے یہ لیپ ٹاپ صرف اور صرف میرٹ کی بنیاد پر تقسیم کئے جائیں گے، کوئی اس میں سفارش نہیں ہوگی، یہی پالیسی میری پنجاب میں تھی اور یہی پالیسی آج یہاں پر ہے۔
شہباز شریف نے کہا کہ بھارت ہم سے پانچ گنا بڑا ملک ہے، اسے اپنی عسکری قوت کے اوپر ناز تھا، وہ سب ناز، اس کا غرور 10 مئی کو غرق ہو گیا۔انہوں نے کہا کہ نوجوانوں نے محنت اور اعلی تعلیم حاصل کر کے پاکستان کو عظیم بنانا ہے
