خیبر پختونخوا حکومت کو سرکاری ہیلی کاپٹر حادثے سے متعلق ابتدائی رپورٹ موصول ہوگئی ہے جس میں حادثے کی بنیادی وجہ خراب موسم اور شدید دھند کو قرار دیا گیا ہے۔
ابتدائی رپورٹ کے مطابق، خیبر پختونخوا حکومت کا ہیلی کاپٹر صبح 10 بج کر 30 منٹ پر باجوڑ کے علاقے سلار زئی کے لیے روانہ ہوا تھا۔ ہیلی کاپٹر امدادی کارروائیوں کی انجام دہی کے بعد واپسی پر ضلع مہمند کے مقام چینگی بانڈہ کے قریب حادثے کا شکار ہوا۔
رپورٹ میں کہا گیا ہے کہ ہیلی کاپٹر بادلوں اور دھند سے ڈھکے ایک بلند پہاڑ سے ٹکرا گیا اور اس کا ملبہ خشک نالے میں گرا۔ حادثے کی تصدیق ڈرون کیمروں کی مدد سے شام 4 بج کر 45 منٹ پر کی گئی۔
حادثے میں 5 افراد شہید ہوئے، جن میں پائلٹ شاہد سلطان اور ریٹائرڈ ونگ کمانڈر آفتاب شامل ہیں۔ شہدا کی میتیں ہیلی کاپٹر کے ذریعے پشاور منتقل کردی گئیں۔
خیبر پختونخوا، گلگت بلتستان اور آزاد کشمیر میں حالیہ دنوں میں کلاؤڈ برسٹ، لینڈ سلائیڈنگ اور سیلابی ریلوں نے بڑے پیمانے پر تباہی مچائی ہے۔ مختلف حادثات میں اب تک 250 سے زائد افراد جاں بحق ہوچکے ہیں جبکہ درجنوں دیہات متاثر ہوئے ہیں۔
