لاہور – پنجاب کے مختلف شہروں میں جاری بارش کے سلسلے نے موسم کو خوشگوار بنا دیا ہے، جبکہ کراچی میں بھی رات گئے بادل برسے جس سے شہر کا درجہ حرارت کم ہوگیا اور ٹھنڈی ہوائیں چلنے لگیں۔
صوبائی دارالحکومت لاہور میں مال روڈ، ایبٹ روڈ، گڑھی شاہو، ریلوے اسٹیشن، لکشمی چوک، ڈیوس روڈ، کینال روڈ، جیل روڈ، ماڈل ٹاؤن اور جوہر ٹاؤن سمیت مختلف علاقوں میں بارش ہوئی۔ بارش کے باعث نشیبی علاقوں میں پانی جمع ہوگیا جبکہ کئی علاقوں میں فیڈرز ٹرپ ہونے سے بجلی کی فراہمی معطل ہو گئی۔
پنجاب کے دیگر شہروں میں بھی بارش کا سلسلہ جاری رہا۔ ملتان، فیصل آباد، خانیوال، وہاڑی، پیر محل، بہاولپور، دنیاپور، ساہیوال، پاکپتن اور میاں چنوں میں بارش کے باعث موسم خوشگوار ہو گیا، تاہم بعض علاقوں میں نشیبی مقامات پر پانی کھڑا ہونے سے شہریوں کو مشکلات کا سامنا کرنا پڑا۔
دوسری جانب کراچی میں بھی رات گئے مختلف علاقوں میں بارش اور بوندا باندی ہوئی۔ اورنگی ٹاؤن، نیو کراچی، منگھوپیر، بلدیہ، سرجانی، ناظم آباد، نارتھ ناظم آباد، بفرزون، گلشن اقبال اور گلستان جوہر سمیت مختلف علاقوں میں کہیں ہلکی اور کہیں تیز بارش ریکارڈ کی گئی۔
شہر کے متعدد علاقوں میں فیڈرز ٹرپ ہونے کے باعث بجلی کی فراہمی معطل ہوگئی جس سے شہریوں کو مشکلات کا سامنا کرنا پڑا۔
ادھر خیبرپختونخوا اور آزاد کشمیر کے مختلف شہروں میں بھی موسلادھار بارش کے بعد موسم خوشگوار ہوگیا ہے۔ محکمہ موسمیات نے آئندہ دنوں میں مزید بارشوں کی پیش گوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
