مسلم لیگ (ن) نے آزاد کشمیر حکومت سے علیحدگی کا اعلان کر دیا ہے، مسلم لیگ ن آزاد کشمیر کے صدر شاہ غلام قادر نے کہا کہ اگر پیپلز پارٹی تحریک عدم اعتماد لاتی ہے تو یہ ان کا جمہوری حق ہے، مسلم لیگ ن کسی نئی حکومت کا حصہ نہیں بنے گی ۔
صدر مسلم لیگ (ن) آزاد کشمیر شاہ غلام قادر نے کہا کہ کسی غیرفطری حکومت سازی کا حصہ نہیں بنیں گےمسلم لیگ (ن) اب اپوزیشن میں بیٹھےگی، جو بھی جماعتی پالیسی سے انحراف کرے گا، پارٹی کارروائی کا سامنا کرے گا، نئی حکومت صرف شفاف عام انتخابات سے ہی ممکن ہے، مسلم لیگ (ن) آزاد کشمیر مہاجرین اور بیرون ملک کشمیریوں کی فلاح کے لیے سرگرم ہے۔
شاہ غلام قادر نے کہا کہ مسلم لیگ (ن) آزاد کشمیر ایک منظم اور مقبول جماعت کے طور پر ابھری ہے، ہم آئینی و سیاسی بحران کے حل میں مثبت کردار ادا کرتے رہیں گے ، آزاد کشمیر میں مضبوط حکومت صرف عام انتخابات سے قائم ہو سکتی ہے، نواز شریف اور شہباز شریف کی قیادت میں بھرپور انتخابی مہم چلائیں گے۔
انہوں نے کہا کہ اگرکوئی شخص یاگروہ حکومت سازی میں شمولیت کی سوچ رکھتاہے، وہ شخص جماعتی پالیسیوں سےانحراف کامرتکب ہوگا، مسلم لیگ ن کامتفقہ فیصلہ ہےکہ وہ انوارالحق حکومت کاحصہ نہیں رہےگی، مسلم لیگ ن آئندہ اپوزیشن میں رہ کر اپنا کردار ادا کرے گی، مسلم لیگ ن حکومت سازی کی حالیہ کوششوں کابھی حصہ نہیں بنےگی۔
