واشنگٹن ڈی سی – فیفا نے ورلڈ کپ 2026 کے فائنل ڈراز کے طریقہ کار کی باضابطہ تصدیق کر دی ہے، جس کے تحت 5 دسمبر کو شریک ٹیموں کو معلوم ہو جائے گا کہ ٹرافی کے حصول تک پہنچنے کے لیے انہیں کس راہ پر آگے بڑھنا ہوگا۔ ایونٹ کا فائنل 19 جولائی 2026ء کو نیویارک اور نیو جرسی میں کھیلا جائے گا، جبکہ 48 ٹیموں پر مشتمل فیفا کے پہلے ورلڈ کپ کے آغاز میں اب 200 دن سے بھی کم وقت باقی رہ گیا ہے۔
ڈراز کی تقریب واشنگٹن ڈی سی کے جان ایف کینیڈی سینٹر فار دی پرفارمنگ آرٹس میں منعقد ہوگی، جہاں کوالیفائیڈ اور زیر غور ٹیموں کے کوچز اور آفیشلز شرکت کریں گے۔ فیفا کے مطابق میزبان ممالک کینیڈا، میکسیکو اور امریکہ کو پوٹ 1 میں رکھا گیا ہے جبکہ دیگر 39 ٹیموں کو 19 نومبر 2025ء کی فیفا/کوکا کولا ورلڈ رینکنگ کے مطابق چار پوٹس میں تقسیم کیا گیا ہے۔ دو عالمی پلے آف مقامات اور یورپ کے چار پلے آف پلیس ہولڈرز بھی پوٹ 4 میں شامل کیے گئے ہیں۔
ڈراز کا آغاز پوٹ 1 سے ہوگا اور ٹیموں کو گروپ A سے گروپ L تک رکھا جائے گا، اس کے بعد باری باری پوٹ 2، 3 اور 4 کی ٹیموں کو گروپس میں شامل کیا جائے گا۔ میزبان ممالک کو مختلف رنگوں کی گیندوں کے ذریعے مخصوص پوزیشن دی گئی ہے، جن کے مطابق میکسیکو کو A1، کینیڈا کو B1 اور امریکہ کو D1 پر رکھا جائے گا، جبکہ دیگر ٹاپ رینکڈ ٹیمیں اپنے گروپس میں خودکار طور پر پہلی پوزیشن پر فٹ ہوں گی۔
مسابقتی توازن برقرار رکھنے کے لیے یہ اصول بھی طے کیا گیا ہے کہ فیفا رینکنگ میں سرفہرست چار ٹیموں—سپین، ارجنٹائن، فرانس اور انگلینڈ—کو سیمی فائنلز کے مختلف راستوں میں رکھا جائے گا تاکہ وہ فائنل سے قبل ایک دوسرے کے مدمقابل نہ آئیں۔ اسی طرح ایک ہی کنفیڈریشن کی ایک سے زیادہ ٹیمیں کسی ایک گروپ میں شامل نہیں ہوں گی، البتہ یورپی ٹیموں کو اس سے استثنیٰ حاصل ہوگا اور ہر گروپ میں زیادہ سے زیادہ دو یورپی ٹیمیں شامل کی جا سکتی ہیں۔
ڈراز کے ایک روز بعد 6 دسمبر کو میچز کا نیا شیڈول جاری کیا جائے گا، جس میں ہر مقابلے کے لیے اسٹیڈیم اور کک آف کا وقت شامل ہوگا۔ فیفا کے مطابق شیڈول کا مقصد دنیا بھر کے شائقین اور ٹیموں کے لیے موزوں حالات اور بہتر اوقات کو یقینی بنانا ہے۔
About The Author
