واشنگٹن ڈی سی — ڈبلیو ڈبلیو ای کے لیجنڈ ریسلر جان سینا نے سنیچر نائٹس مین ایونٹ میں اپنے طویل اور شاندار ریسلنگ کیریئر کو باضابطہ طور پر الوداع کہہ دیا۔ 17 مرتبہ ورلڈ چیمپئن رہنے والے سینا نے اپنے آخری مقابلے میں آسٹریا کے اسٹار ریسلر گنتر کا سامنا کیا۔
مقابلے کے دوران دونوں ریسلرز کے درمیان جوش و خروش اور برابر کی ٹکر دیکھی گئی، جس میں دونوں نے اپنے بہترین حربے اور مہارت کا مظاہرہ کیا۔ ایک موقع پر جان سینا کے حق میں لگ رہا تھا کہ مقابلہ جیت کی جانب جائے گا، لیکن گنتر کے مسلسل اور طاقتور سلیپر ہولڈ کے سامنے سینا خود کو بچانے میں ناکام رہے اور مقابلہ گنتر کے حق میں ختم ہوا۔
مقابلے کے اختتام پر جان سینا نے علامتی طور پر اپنے جوتے، آرم بینڈ اور کلائی بینڈز رنگ میں رکھ دیے، جو ریسلنگ کی دنیا میں ریٹائرمنٹ کی واضح علامت سمجھی جاتی ہے۔ یہ لمحہ نہ صرف جان سینا بلکہ ڈبلیو ڈبلیو ای کے مداحوں کے لیے بھی جذباتی ثابت ہوا، جنہوں نے سنیچر نائٹس مین ایونٹ کے دوران انہیں ان کے کیریئر کی کامیابیوں اور خدمات کے لیے خراج تحسین پیش کیا۔
جان سینا نے ریسلنگ کی دنیا میں ایک طویل عرصے تک تسلط برقرار رکھا، اور ان کے نام 17 ورلڈ چیمپئن شپ ٹائٹلز اور بے شمار یادگار مقابلے ہیں، جو انہیں ہر دور کے مشہور ریسلرز میں شامل کرتے ہیں۔ ان کی ریٹائرمنٹ سے ریسلنگ کے شائقین کے لیے ایک دور کا اختتام ہوا۔
About The Author
