مقبوضہ بیت المقدس — حماس کے سیکنڈ ان کمانڈر رعد سعد ہفتے کے روز اسرائیلی حملے میں شہید ہو گئے، اس کی تصدیق حماس کے رہنما خلیل الحیا نے کی۔ اسرائیلی فوج اور سکیورٹی ایجنسی شین بیت نے بھی دعویٰ کیا ہے کہ غزہ میں کیے گئے ایک حملے میں حماس کے سینئر رہنما رائید سعد مارے گئے۔
رعد سعد القسام بریگیڈ کے ہتھیاروں کے شعبے کے سربراہ اور گروپ کے سینئر ترین رہنماؤں میں شامل تھے۔ وہ 7 اکتوبر 2023 کے حملے کی قیادت کرنے والے اہم رہنماؤں میں شمار ہوتے تھے اور جنگ بندی کے بعد تشکیل پانے والی فوجی کونسل کے رکن بھی تھے۔
حملے کے دوران غزہ شہر میں ایک گاڑی کو نشانہ بنایا گیا جس میں رعد سعد شہید ہوئے اور دیگر چار افراد زخمی ہوئے۔ حملے کے قریب سے گزرنے والے متعدد شہری بھی زخمی ہوئے۔ حماس نے مزید بتایا کہ اس واقعے میں ایک اور سینئر رہنما بھی ہلاک ہوا۔
حماس کی وزارت داخلہ کے مطابق اسی دن داخلہ سیکورٹی آفیسر لیفٹیننٹ کرنل احمد زمزم کو بھی اسرائیلی حمایت یافتہ گروپ نے غزہ کے مقازی مہاجر کیمپ میں ہلاک کیا، ابتدائی تحقیقات کے مطابق یہ کارروائی اسرائیلی انٹیلی جنس کے براہِ راست احکامات پر انجام دی گئی۔ ایک مشتبہ شخص کو گرفتار کر لیا گیا ہے اور باقی مجرموں کا پیچھا جاری ہے۔
خلیل الحیا نے حماس کی 38 ویں سالگرہ کے موقع پر نشر کی گئی تقریر میں کہا کہ رعد سعد اپنے بھائیوں کے ساتھ شہید ہوئے، تاہم اس نے تفصیلاً وضاحت نہیں کی۔
اسرائیلی حکام کے مطابق رعد سعد کو کئی مرتبہ ہلاک کرنے کی کوشش کی جا چکی تھی اور وہ طویل عرصے سے اسرائیل کے سب سے زیادہ مطلوب حماس رہنماؤں میں شامل تھے۔ اس پیش رفت کے بعد غزہ میں کشیدگی میں مزید اضافہ ہونے کا خدشہ ہے، جبکہ بین الاقوامی سطح پر بھی خطے کی سلامتی اور انسانی صورتحال پر تشویش کا اظہار کیا گیا ہے۔
About The Author
