بھارتی فوج کو جنگی محاذ کے علاوہ داخلی نظام اور تربیت میں بھی مختلف چیلنجز کا سامنا ہے۔ بھارتی میڈیا کی حالیہ رپورٹس میں فوجی اہلکاروں کی خودکشیوں، تربیتی حادثات اور فوجی تنصیبات سے اسلحہ چوری کے واقعات کا ذکر کیا گیا ہے۔ ان واقعات نے بھارتی فوج کے تربیتی نظام اور سیکیورٹی انتظامات پر سوالات اٹھا دیے ہیں۔
بھارتی جریدے انڈیا ٹوڈے کے مطابق سابق فوجی شیوانند ریڈی نے خودکشی کی کوشش کی۔ رپورٹ کے مطابق وہ زمین کی الاٹمنٹ کے معاملے میں طویل تاخیر سے پریشان تھے۔ سابق فوجی گزشتہ 20 سال سے دفاعی اہلکاروں کے لیے مختص زمین حاصل کرنے کی کوشش کر رہے تھے۔ رپورٹ کے مطابق معاملے میں پیش رفت نہ ہونے پر وہ شدید مایوسی کا شکار ہوئے۔
دی نیو انڈین ایکسپریس کی ایک رپورٹ میں بھارتی سینٹرل ریزرو پولیس فورس (CRPF) میں خودکشیوں کا بھی ذکر کیا گیا۔ رپورٹ کے مطابق گزشتہ سال CRPF کے 59 اہلکاروں نے خودکشی کی۔ رپورٹ میں ان واقعات کو مایوسی اور ذہنی دباؤ سے جوڑا گیا ہے۔ یہ اعداد و شمار بھارتی سیکیورٹی فورسز میں اہلکاروں کی ذہنی صحت اور کام کے دباؤ سے متعلق مسائل کی نشاندہی کرتے ہیں۔
دی ہندو کی رپورٹ کے مطابق سکندرآباد میں ایک فوجی تنصیب سے چار رائفلیں اور دیگر ہتھیار چوری ہوئے۔ رپورٹ کے مطابق ملزمان انتہائی حساس فوجی احاطے میں داخل ہونے میں کامیاب ہوئے۔ انہوں نے فوجی اسلحہ ذخیرہ کرنے والے مقام تک بھی رسائی حاصل کی۔ اس واقعے نے حساس فوجی تنصیبات کی سیکیورٹی پر تشویش پیدا کر دی ہے۔
About The Author
