برمنگھم – برطانیہ کے شہر برمنگھم کے رہائشیوں میں گزشتہ رات شدید تشویش اور خوف پھیل گیا جب آسمان اچانک گہرے گلابی رنگ میں ڈھل گیا۔ یہ منظر شدید برف باری کے دوران سامنے آیا، جس نے شہر میں آمدورفت متاثر کی اور متعدد خدمات معطل ہو گئیں۔
شہریوں نے اس غیر معمولی منظر کی تصاویر اور ویڈیوز سوشل میڈیا پر شیئر کرنا شروع کیں، جس کے بعد عوام میں یہ قیاس آرائی شروع ہوئی کہ آیا یہ مظہر برفانی طوفان سے جڑا ہے یا کسی اور وجہ سے ہے۔
بعد ازاں معلوم ہوا کہ یہ کوئی قدرتی مظہر نہیں بلکہ انسانی پیدا کردہ روشنیوں کی وجہ سے ہوا۔ ذرائع کے مطابق، برمنگھم سٹی فٹبال کلب کے اسٹیڈیم کی طاقتور ایل ای ڈی (LED) لائٹس نے اس گلابی روشنی کا سبب بنائی۔ برف کے ذرات اور گھنے بادل روشنی کو منتشر کر کے پورے شہر کے آسمان میں پھیلا رہے تھے، جس سے یہ نایاب منظر پیدا ہوا۔
اخبار میٹرو کے مطابق، اسٹیڈیم کی روشنیاں خاص طور پر میدان کی گھاس کی حفاظت اور بحالی کے لیے استعمال کی جاتی ہیں، اور جب برف اور بادل موجود ہوں تو روشنی زیادہ پھیلتی اور واپس زمین کی جانب منعکس ہوتی ہے۔ اس کے نتیجے میں برمنگھم کے شہری آسمان پر ایک گلابی چمک دیکھنے میں کامیاب ہوئے، جس کا مرکز اسٹیڈیم کے قریب تھا۔
یہ واقعہ شہریوں کے لیے ایک حیران کن اور نادر تجربہ رہا، جبکہ حقیقت سامنے آنے کے بعد خوف و ہراس ختم ہوا اور اسے ایک مصنوعی اور تکنیکی مظہر قرار دیا گیا۔
About The Author
